दमक, माघ १४
गुणस्तरीय पठनपाठनमा अब्बल झापाको दमक २ स्थित हिमालय माद्यमिक विद्यालयको ६९ औं वार्षिकोत्सवका अवसरमा सोमबार सो विद्यालयका विद्यार्थीकालागि गायन र नृत्य सम्बन्धिको ‘हिमालय सिङ्गिङ र डान्सिङ आइडल’ सम्पन्न भएको छ ।
दुइदिने कार्यक्रमको उद्घाटन दमक नगर उपप्रमुख रेगिना भट्टराई प्रसाईंको प्रमुख आतिथ्यतामा सम्पन्न भयो ।
प्रतियोगिता अन्तर्गत, सिनियर डान्सिङतर्फ कक्षा ८ सेक्सन ए की रेविका बस्नेत, ८ ए की विनिता बुढाथोकी र ९ बी की जेनिसा ढकालले क्रमशः विजेता, उपविजेता र तेस्रो स्थान हााँसिल गर्नुभयो । जुनियरतर्फ, कक्षा २ ए की आदिस्ना वस्ती, ३ ए की जेनिसा माझी र ३ बी की समुना न्यौपानेले क्रमशः विजेता, उपविजेता र तेस्रो स्थान प्राप्त गर्नुभयो ।
सिनियर सिङ्गिङ्तर्फ, कक्षा ९ बी की साइना बोहोरा र ९ बी कै अस्मिता दर्जी क्रमशः विजेता र उपविजेता बन्नु भयो । विजेतालाई क्राउनसहित नगद ३ हजार र उपविजेतालाई १ हजार ५ सय, ट्रफी, प्रमाणपत्र प्रदान गरियो । अन्य सबैलाई फाइनलिस्ट घोषणा गरिएको विद्यालयका नृत्य तथा गायन संयोजक शिक्षक वीरबहादुर लावतीले जनाउनु भयो ।
सिनियर डान्सिङतर्फ विजेतालाई नगद ७ हजार, क्राउन, ट्रफी, प्रमाणपत्र प्रदान गरिएको छ । उपविजेता र तेस्रो हुनेलाई क्रमशः नगद ४ हजार र २ हजार तथा जुनियरतर्फ विजेतालाई ४ हजार, क्राउन, ट्रफी र प्रमाणपत्र प्रदान गरिएकाको छ । उपविजेता र तेस्रो हुनेलाई क्रमशः २ हजार र १ हजार ५ सयसहित ट्रफी र प्रमाणपत्र प्रदान गरिएको विद्यालयका प्रधानाध्यापक द्रोणबहादुर श्रेष्ठले जनाउनु भयो । विजेता सबैलाई पठनपाठनमा पूर्ण छात्रबृत्ति प्रदान गरिएको छ ।
विद्यार्थीबाट भएको फुडफेस्टिभल, दन्तशिविर र रक्तदान समेत गरिएको कार्यक्रममा दमकका पूर्व नगरप्रमुख एवम् विद्यालय व्यवस्थापन समिति अध्यक्ष रोमनाथ ओली, नगरका सबैभन्दा बढी रक्तदान गर्ने रक्तदाता सामाजिक अभियन्ता राजकुमार श्रेष्ठसहितको उपस्थिति रहेको थियो । वार्षिकोत्सव समापनसहित भोलि हुने अभिभावक दिवसमा विशेष कार्यक्रम समेत हुनेछ ।
