अमेरिका, माघ १५
अन्तर्राष्ट्रिय नेपाली साहित्य समाज डेनमार्क च्याप्टरले राजधानी कोपनहेगनमा विशेष साहित्यिक कार्यक्रमको आयोजना गर्दै कवि सुदर्शन पोखरेलको कविता संग्रह ‘विश्वासमाथि उभिएर’को विमोचन सम्पन्न गरेको छ ।
कार्यक्रममा प्रमुख अतिथि नेपाली दूतावासकी कार्यवाहक राजदूत सावित्रा वलीले संग्रह विमोचन गर्दै प्रवासमा नेपाली भाषामा साहित्य सृजना र पठन संस्कृतिको अभ्यासलाई अत्यन्तै सह्राहनीय कदमका रूपमा व्यक्त गर्नुभयो । कार्यवाहक राजदूत वलीले नेपाली भाषा र साहित्यले मात्र मौलिक पहिचानलाई जोगाएर राख्न सक्ने बताउँदै प्रवासमा यस्ता क्रियाकलापले भाषा, संस्कृति र पहिचानलाई थप बलियो बनाउने धारणा राख्नुभयो ।
कार्यक्रममा विमोचित पुस्तकबारे टिप्पणी गर्दै कवि प्रकाश सापकोटाले ‘विश्वासमाथि उभिएर’मा सङ्ग्रहित कविताहरू विचार, पौराणिक ज्ञान र विज्ञानको समिश्रणले भरिपूर्ण रहेको बताउनुभयो । भर्चुअल माध्यमबाट साहित्यकार युवराज नयाँघरे र धर्मेन्द्र तिमिल्सिनाले पुस्तक र कवि पोखरेललाई शुभकामना प्रदान गर्दै नेपाली साहित्यको यो योगदानलाई प्रशंंसा गर्नुभयो ।
संग्रहका सर्जक सुदर्शन पोखरेलले पहिलो कृति सार्वजनिक गर्न पाउँदा अत्यन्त खुशी लागेको जनाउँदै कार्यक्रममा आफ्ना गद्य र पद्य कविताहरू वाचन गर्नुभयो । उहाँले यो संग्रह आफ्ना विचार र अनुभवहरूको अभिव्यक्ति भएको बताउँदै साहित्यिक यात्रा निरन्तर जारी राख्ने प्रतिबद्धता व्यक्त गर्नुभयो ।
कार्यक्रममा साहित्य, विचार र सृजनाको बेजोड संयोजन मात्र नभई, नेपाली भाषा र साहित्यको प्रवासमा संरक्षण र प्रोत्साहन गर्ने प्रतिबद्धता स्पष्ट देखिएको थियो । ‘विश्वासमाथि उभिएर’को विमोचन र च्याप्टरको गतिविधिले नेपाली साहित्यप्रति डेनमार्कका साहित्यप्रेमीहरूको समर्पणलाई झल्काएको छ ।
