दमक, फागुन १२
अमेरिकी सरकारले पछिल्लो समयमा नेपालमा एमसीसीका कार्यक्रम स्थगित गरेको अवस्थामा अमेरिकी सहयोग नियोग (युएसएआईडी) ले नेपालमा सञ्चालन गरेका सात वटा कार्यक्रम पनि स्थगित गरेको छ ।
अर्थ मन्त्रालयले सोमबार विज्ञप्ति निकालेर ती कार्यक्रमहरू स्थगित भएका जानकारी दिएको छ । ‘अमेरिकी राष्ट्रपति (डोनाल्ड ट्रम्प) बाट २० जनवरी २०२५ मा जारी कार्यकारी आदेशबमोजिम नेपाल सरकारको बजेट प्रणालीमार्फत् सञ्चालित शिक्षा, स्वास्थ्य, कृषि र तथ्यांकसँग सम्बन्धित चारवटा कार्यक्रम ९० दिनका लागि रोकिएको जानकारी प्राप्त भएको छ’, मन्त्रालयले भनेको छ, ‘त्यस्तै, जैविक विविधता, प्रदेश एवम् स्थानीय शासन सुदृढीकरण कार्यक्रम र जलवायु उत्थानशील नगरपालिका सेवा कार्यक्रम डिजाइनका क्रममा रहेकोमा उक्त आदेशबाट यी समेत रोकिएको अवस्था छ ।’
डिजाइनका क्रममा रहेका तीनवटा कार्यक्रमका लागि सम्झौता नभइसकेकै अवस्थामा रोकिएका हुन् । ती कार्यक्रम सहयोग प्राप्तिका लागि प्रक्रियामा थिए ।
अमेरिकी सहयोग नियोगबाट नेपालमा सन् १९५१ देखि निरन्तर रूपमा अनुदान सहायतामार्फत् विभिन्न कार्यक्रम सञ्चालन हुँदै आएको अवस्था थियो । युएसएआईडीका सबै कार्यक्रम बन्द भइसेका छन् ।
यसअघि ट्रम्प प्रशासनले मिलेनियम च्यालेन्ज कर्पोरेशन (एमसीसी) सहित वित्तीय संघीयता कार्यान्वयन र जैविक विविधता संरक्षणसम्बन्धी कार्यक्रमका लागि नेपाललाई दिँदै आएको लगानी रोक्का गरिसकेको छ ।
