दमक, २३ चैत । आगामी आर्थिक वर्ष २०८२/०८३ का लागि संघीय सरकारले तयार गर्न लागेको बजेटको पूर्व तयारीका सन्दर्भमा झापाको बिर्तामोडमा शनिबार बृहत छलफल भएको छ ।
आन्तरिक राजश्व विभागका महानिर्देशक मदन दाहालको सहभागितामा नेपाल चार्टर्ड एकाउण्टेण्ट्स संघ झापाले आयोजना गरेको सो कार्यक्रममा निजी क्षेत्रका प्रतिनिधिहरु बीच आगामी बजेटको पूर्व तयारी बारे अन्तरक्रियात्मक छलफल गरिएको हो ।
नेपाल चार्टर्ड एकाउण्टेण्ट्स संघकी सञ्जिता नेपालले सहजीकरण गरेको प्यानल डिस्कसनमा निजी क्षेत्रको तर्फबाट नेपाल उद्योग वाणिज्य महासंघका केन्द्रीय सदस्य उमेश डालमिया, नेपाल चार्टर्ड एकाउण्टेण्ट्स संघ केन्द्रीय अध्यक्ष अरुण राउत, नेपाल चेम्बर अफ कमर्सका केन्द्रीय सदस्य ओमकृष्ण विमली र चार्टर्ड एकाउण्टेण्ट्स शैलेन्द्र उप्रेती सहभागी बन्नु भएको थियो ।
छलफलमा उद्योगी–व्यवसायीहरुले अर्थतन्त्रको वर्तमान खस्कँदो अवस्थालाई मध्यनजर गर्दै आगामी बजेटको मस्यौदा तयार गर्नुपर्ने बताए । उनीहरुले हाल उद्योग पूर्ण क्षमतामा सञ्चालन नभइरहेको र व्यवसाय पनि सन्तोषजनक ढंगले चलायमान हुन नसकिइरहेको अवस्थालाई ध्यानमा राखेर करहरुको तर्जुमा गर्नुपर्ने सुझाव दिएका छन् । कतिपय अवस्थामा दोहोरो–तेहेरो करका कारण उद्योगी–व्यवसायी हतोत्साही हुने गरेको गुनासो गर्दै नीति–नियम उद्योग–व्यवसायमैत्री बन्न सके मात्र आर्थिक गतिविधिलाई गति दिन सकिने सुझाव प्रस्तुत भयो ।
महानिर्देशक दाहालले उद्योगी–व्यवसायीहरुको तर्फबाट गहन सुझाव प्राप्त भएको भन्दै आएका सुझावहरुलाई आगामी बजेटका सन्दर्भमा विभिन्नस्तरमा हुने छलफलमा आफूले प्रस्तुत गर्ने र सुझावहरु सम्बोधन हुने गरी बजेट तर्जुमाका लागि आफूले पहल गर्ने बताउनु भयो ।
कार्यक्रममा नेपाल उद्योग वाणिज्य महासंघ कोशी प्रदेशका निवर्तमान अध्यक्ष टिकाराज ढकाललगायतले मन्तव्य व्यक्त गर्नुभयो । दाहाललाई महानिर्देशकमा नियुक्त हुनु भएकोमा सम्मान समेत प्रदान गरिएको थियो ।
