दमक, १३ बैशाख / जननि जन्मभूमिश्च स्वर्गादपी गरियसी । अर्थात जन्मदिने आमा धर्ती समान हुन्छिन् ।
यो संसारमा आमाको जत्तिको महत्व केही चिज बस्तुको नि हुँदैन । सर्वत्र सर्वश्रेष्ठ माताहरुको सम्मानमा यो बेला विभिन्न संघ संस्थाले कार्यक्रम आयोजना गरिरहेका छन् ।
माताहरुलाई पुजन गर्ने मातातीर्थ औंशी भोलि हो । त्यसको अवसरमा दमक ६ स्थित सूर्यदर्शन वचत तथा ऋण सहकारी संस्थाले आज एक कार्यक्रमकाबीच सहकारी संस्थामा आवद्ध ज्येष्ठ माताहरुलाई सम्मानित गरेको छ ।
अहिले बढ्दै गएको एकल परिवारको अवधारणा, पश्चिमा संस्कृतिको असर तथा छोराछोरी घर छोडेर बाहिर बस्ने चलनले मातापिताहरु परिवारिक माहोलबाटा टाढा र निरश जीवन विताउन बाध्य भएको परिस्थिति छ ।
यसखाले परिस्थितिबीचको कार्यक्रममा सम्मानित हुन पाउँदाको क्षणमा माताहरु हर्षविभोर देखिनु भयो । सम्मान ग्रहणपछि दमक २ की इन्द्रमाया सुवेदीले आफूहरुको पालामा यस्तोखाले कार्यक्रम नहुने गरेको स्मरण गर्दै अहिले यस्ताखाले सम्मान भएकोमा धेरै खुसी लागेको प्रतिक्रिया दिनु भएको छ ।
कार्यक्रममा सहभागिताको निम्तो स्वीकार गर्दै आइपुग्नु भएका दमक ८ का ज्येष्ठ नागरिक कृष्णप्रसाद कट्टेलले माताहरुप्रतिको यसखाले सम्मानप्रति खुसी व्यक्त गर्नुभयो । उहाँ भन्नुहुन्छ ‘हाम्रो संस्कृतिको संरक्षण गर्दै तीर्थ ब्रत भन्दा ठूली माताको यसरी सम्मान हुनु गौरबको कुरा हो ।’
मातापिता साक्षत भगवानको रुप रहेको तथ्यलाई मनन् गर्दै सहकारीले शेयर सदस्यकाबीचमा विगत १४ वर्षदेखि यसखाले कार्यक्रम राखेको सहकारीका सचिव कमल नेपालले औचित्य पुष्टि गर्नुभयो ।
सामाजिक व्यक्तित्व र संघ संस्थाहरुले सिक्नुपर्ने काम सूर्यदर्शनले सुरु गरेको भन्दै दमक ६ का वडाध्यक्ष टेकबहादुर थापाले प्रसंशा गर्नुभयो ।
कार्यक्रममा ज्येष्ठ माताहरुले आशिर्वादकासाथै मौलिक संगीनी समेत प्रस्तुत गरेर लोप हुन लागेका संस्कृति संरक्षणको सन्देश समेत दिनु भएको छ ।
