दमक, ५ जेठ । दमकको मुख्य बजारमा दमक नगरपालिका र नगर विकास कोषको लगानीमा ५ तले व्यवसायिक भवन धमाधम बनिरहेको छ ।
हालसम्म १८ प्रतिशत भौतिक प्रगति र १६ प्रतिशत आर्थिक प्रगति भइसकेको परियोजनाका कन्सल्टेण्ट किरण कुमार महतले प्रगति विवरण जानकारी गराउने क्रममा सो कुरा बताउनु भयो । दमकको इतिहास जोडिएको यो ठाउँमा बन्ने यो व्यावसायिक भवनले दमकको पहिचानलाई बदल्ने अपेक्षा गरिएको छ ।
यदि नियमित काम भयो भने अबको ९ महिनापछि दमकस्थित पुरानो सुनचाँदी लाइनमा भव्य व्यावसायिक महल निर्माण भइसक्ने छ । ४३ करोड लागतमा बन्ने भवन सुविधायूक्त ५ तलासम्मको बन्ने छ ।
दमकको इतिहास जोडिएको यो ठाउँमा बेग्लै पहिचान थियो । खासगरी व्यावसायिक चलायमान गराउन र दमकलाई व्यावसायिक हब बन्ने हिसाबको इतिहास थियो । तर त्यसको नामोनिसान मेटाएर यहाँ दमक नगरपालिकाले ऋण लिएर सपिङ कम्प्लेक्स बन्न थालेको छ । यसले दमकका व्यवसाय चलायमान बनाउन मद्धत पुर्ाउने वडा नं ७ का वडाध्यक्ष भीम पौडेल विश्वास व्यक्त गर्नुहुन्छ ।
लामो समयको बिवाद र मुद्धा मामिला समेत झेलेर यो ठाउँमा सपिङ कप्लेक्स बन्न लागेको हो । यसले दमकको व्यवसायलाई चलायमान बनाउने र दमकलाई आधुनिक सहरमा प्रवेश गराउन मद्यत गर्ने नगर प्रमुख रामकुमार थापा र उपप्रमुख रेगिना भट्टराई प्रसाईले उल्लेख गर्नु भएको छ । सोमबार यसको भूमि पूजन गरिएको छ ।
यदि यो परियोजनाको काम गर्दा समयमा भुक्तानी भयो र कुनै रोकावट नभएमा निर्धारीत समय भन्दा पनि अगावै निर्माण सम्पन्न गरिसक्ने निर्माण पक्षका माधवप्रसाद चौलागाईंको भनाइ छ ।
यो परियोजना निर्माण गर्न ४३ करोड २४ लाख १६ हजार ६ सय ४४ बजेटमा ठेक्का लागेको छ । २०८१ भदौ ९ गते परियोजना निर्माणको काम प्रारम्भ भएको थियो । अव ९ महिनापछि अर्थात २०८२ पुस २४ गते सम्ममा निर्माण गरिसक्नु पर्ने सम्झौतामा उल्लेख छ । काम गर्न काठमाडौमा रहेको नव सिर्जनशील बंगलामुखी जेवीलाई ठेक्का दिइएको छ ।
