काठमाडौं,३ मंसिर । नेकपा एमालेका महासचिव शंकर पोखरेल र पोलिटब्युरो सदस्य महेश बस्नेत बारा जान खोज्दा सिमरा विमानस्थलमा तनाव भएको स्रोतले जनाएको छ। एमालेको कार्यक्रममा सहभागी हुन बारा पुग्ने थाहा पाएपछि त्यहाँस्थित एउटा समूहले जेन–जीका नाममा तोडफो र प्रदर्शन गरेको छ। जेन–जीका नाममा उत्रिएको यो समूहले एमालेको कार्यक्रम बिथोल्ने गरी विमानस्थलमै प्रदर्शन गरेको छ। विमानस्थलमा खटिएको प्रहरी र जेन–जीका नाममा उत्रिएको उक्त समूहबीच झडपसमेत भएको प्रहरीले जनाएको छ ।
सिमरा विमानस्थलमा तनाव भएपछि काठमाडौंबाट उड्न लागेको बुद्ध एयरको जहाज नै रोकिएको छ । बस्नेत र पोखरेल सवार भएर सिमरा जान लागेको जहाज काठमाडौंमै रोकेर यात्रुलाई प्रतिक्षालयति लगिएको बस्नेत र पोखरेल बारामा बुधबार आयोजना हुने प्रदेशस्तरीय युवा जागरण अभियान कार्यक्रममा सहभागी हुन जान लाग्नु भएको थियो । तर बस्नेत बारा पुग्ने थाहा भएपछि सिमरा विमानस्थलमा जेन–जीका नाममा घेराउ भएको हो। अहिले विमानस्थलमा सुरक्षा कडा पारिएको छ। त्यहाँ नेपाल प्रहरी र सशस्त्र प्रहरी बलको ठूलो टोली तैनाथ गरिएको प्रहरीले जनाएको छ।
बस्नेतसहितलाई स्वागतका लागि विमानस्थल आगमन कक्षमा पूर्वमन्त्री तथा एमाले नेता किसान श्रेष्ठ, ज्वालाकुमारी साह, अच्युत मैनाली लगायतका नेताहरू उपस्थित हुनु भएको थियो । जेन–जीका नाममा एउटा समूहले बस्नेतको आगमनको सूचना पाएलगत्तै सामाजिक सञ्जालमार्फत् विरोध कार्यक्रम घोषणा गरेको थियो । उनीहरूको विरोधका कारण एमालेको कार्यक्रमलाई पनि असर पर्ने देखिएको स्रोतले जनाएको छ ।
