दमक, ३ मंसिर | जेन–जी आन्दोलनका क्रममा दमक इलाका प्रहरी कार्यालयमा भएको तोडफोड, आगजनी र लुटपाट प्रकरणमा संलग्न भएकामा एकजनालाई प्रहरीले पक्राउ गरी महत्वपूर्ण प्रमाणसहित सार्वजनिक गरेको छ।
गत भदौ २४ गते भएको उक्त घटनामा अपराधिक घटना उपए र हातहतियारसम्बन्धी मुद्दा दर्ता गरी अनुसन्धान गरिरहेको प्रहरीले भिडियो प्रमाणकै आधारमा अभियुक्तको पहिचान गरेको जनाएको छ । घटनाका बेला प्रहरीको हतियार साईकलमा बोकेर हिँडिरहेको दृश्य सार्वजनिक भएपछि प्रहरी सक्रिय भएको थियो।
हिजो दिउँसो १:३० बजे दमक नगरपालिका–६ बाट पाँचथर मिक्लाजुङ–३ का २२ वर्षीय सुशील फियाक (लिम्बु) लाई पक्राउ गरिएको छ ।
इलाका प्रहरी कार्यालय दमकमा ल्याइएपछि प्रारम्भिक बयानमा फियाकले तोडफोड र लुटपाटमा संलग्न भएको स्वीकार गर्दै हतियार पाँचथरको आरुबोटे, लामागाउँस्थित एक ओडारमा लुकाएको बताएका थिए।
उनको बयानका आधारमा जिल्ला प्रहरी कार्यालय पाँचथरसँग समन्वय गरी प्रहरी निरीक्षक नविन राईको कमाण्डमा दमकबाट खटिएको प्रहरी टोलीले घटनास्थल पुगेर लुकाइराखिएको हतियार बरामद गरेको छ।
अभियुक्तले दिएको जानकारीका आधारमा
३०३ मार्क–३ राइफल,सिरियल नम्बर ६२०३८ म्याग्जिनसहित, १ थान– , . इन्सास राइफल सिरियल नम्बर ०३११०२७३९ को म्याग्जिन नभएको, बट र ह्याण्ड–ग्रिप जलेको अवस्थामा, १ थान , इन्सासको जंगी राउण्ड १ थान र एसएलआरको जंगी राउण्ड
३ थान रहेका छन ।
प्रहरीले बरामद हतियार र गोलीगठ्ठा प्रमाणसहित कार्यालयतर्फ ल्याउँदै अनुसन्धानलाई थप तीव्र बनाएको जनाएको छ।
दमक प्रहरीमाथि भएको आगजनी, तोडफोड र हतियार लुटपाटमा अन्य व्यक्ति पनि संलग्न रहेको प्रारम्भिक अनुसन्धानले देखाएकाले थप अभियुक्तको पहिचान, खोजतलास र पक्राउका लागि प्रहरी व्यापक रूपमा सक्रिय छ।
प्रहरीका अनुसार यहि घटनाले सुरक्षा निकायको संवेदनशील संरचनामाथिको आक्रमण कतिको गम्भीर छ भन्ने देखाएको छ, र यसलाई संगठित अपराधका रूपमा लिएर अनुसन्धान अघि बढाइनेछ।
