झापा,११ मङ्सिर । कोशी प्रदेशका पहाडी तथा तराईका जिल्लाहरू जोड्ने महत्त्वपूर्ण सडक सञ्जालअन्तर्गत निर्माणाधीन पुलहरूको काम अत्यन्तै सुस्त गतिमा भइरहेको जानकारी पाइएको छ । संघीय सरकारको सडक विभागअन्तर्गत पुल सेक्टर (धरान) ले हेर्नेगरी ४ अर्ब ६२ करोड ५३ लाख बढी रकममा छुट्टाछुट्टै सम्झौता भएका दुई दर्जन पुलमध्ये अधिकांशको प्रगति निराशाजनक देखिएको छ ।
ती पुलहरूमा हालसम्म एक अर्ब ५८ करोड ९९ लाख ३० हजार रुपैयाँ भुक्तानी भइसकेको छ तर यो कुल सम्झौताको करिब ३४.३७ प्रतिशत हो, त्यसमध्ये रणनीतिक पुलको रुपमा रहेका ९ वटा पुलको प्रगति झनै निराशाजनक छन् ।
हालसम्म उक्त पुलहरूको ७६ करोड ९८ लाखमा ठेक्का सम्झौता भए पनि वित्तीय प्रगति भने १५ करोड २७ लाख मात्रै भएको छ । त्यसको तुलनामा १३ वटा रहेका स्थानीय पुलका लागि कुल ३ अर्ब ८५ करोड ५५ लाख २० हजारमा ठेक्का लागेको छ भने हालसम्म एक अर्ब ४३ करोड ७१ लाख रुपैयाँ भुक्तानी भएका छन् ।
उता, कार्यालयको तथ्यांकअनुसार निर्माणाधीन २२ वटा पुलमध्ये केवल ३ वटाको प्रगति सन्तोषजनक छ भने बाँकी आयोजनाहरू वर्षौँदेखि निर्माणाधीन अवस्थामा अल्झि रहेका छन् । पुल सेक्टर धरानका सूचना अधिकारी नवीन कुमार साहले उपलब्ध गराएको विवरण अनुसार कोशी प्रदेशका विभिन्न जिल्लामा निर्माणाधीन पुलहरूमध्ये आधाभन्दा बढीको भौतिक प्रगति ५० प्रतिशत कट्न सकेको छैन ।
विशेषगरी एलआरएन र एसआरएन अन्तर्गतका पुलहरूको अवस्था दयनीय छ । इलामको देउमाई खोलामा निर्माणाधीन पुलको भौतिक प्रगति जम्मा ९ प्रतिशत मात्र भएको छ । आर्थिक वर्ष २०७७÷७८ मा सम्झौता भएको उक्त पुलको ठेक्का नागार्जुन÷प्रधान जेभी काठमाडौँले लिएको थियो ।
त्यस्तै, उदयपुर र खोटाङ जोड्ने बन्सिलाघाट पुलको अवस्था पनि उस्तै छ । आर्थिक वर्ष २०७६÷७७ मा ठेक्का लागेको यो पुलको भौतिक प्रगति हालसम्म ९ प्रतिशत र वित्तीय प्रगति ११ प्रतिशत मात्र देखिएको छ । कालिका÷बेदान्सी जेभीले जिम्मा लिएको यो आयोजना अलपत्र अवस्थामा रहेको छ ।
कोशी प्रदेशको गौरवको आयोजना मानिने तमोर कोरिडोर अन्तर्गतका पुलहरूको निर्माण गति पनि सुस्त रहेको छ । धनकुटा र पाँचथर खण्डमा पर्ने नावा खोला, हेवा खोला, लोरिपा खोला र लाखुवा खोलाका पुलहरूको प्याकेजमा ठेक्का लागेको भए पनि औसत प्रगति निकै कम छ ।
