मोरङ, २१ मंसिर । असोज पहिलो साता हत्या भएकी मोरङ लेटाङ नगरपालिका–२ फडानीकी १३ वर्षीया अंशु गौतमको हत्या आरोपमा एक जना पक्राउ परेको प्रहरीले जनाएको छ् । अंशुको हत्यामा संलग्न भएको आरोपमा मोरङ प्रहरीले बिचारी भनिने पदम अधिकारीलाई पक्राउ गरेको छ । अधिकारी अंशुका छिमेकी भएको प्रहरीले बताएको छ । पोष्टमार्टम रिपोर्टमा उनको हत्या भएको खुलेको छ । सोही रिपोर्टको आधारमा प्रहरीले अपराधीको खोजी गर्ने क्रममा अधिकारी उनकै घरबाट पक्राउ परेका हुन् ।
उनी भारत आसामको तीनसुकिया स्थित कोइलाखाँदमा यतिका दिनसम्म लुकेर बसेका थिए । शनिबार घर फर्किएका अधिकारी प्रहरीले सूचना पाएपछि गएराति पक्राउ गरेको अंशुका परिवारलाई उधृत गर्दै गौतम समाज झापाका अध्यक्ष नीतिरमण गौतमले बताउनुभयो । घटना लगत्तै अघिकारी बेपत्ता भएका हुन्। अधिकारीले आफूले बलात्कार गरेपछि हत्या गरेको स्वीकारेको बताइएका छन् ।
हत्यामा प्रयोग भएका हँसिया र खुकुरीको बिँड घटनास्थल नजिकै जलाएको र हतियार घरभित्र (मचानमा) लगेर लुकाएको जनाएका छन् । त्यसलगत्तै अधिकारी आसाम भागेको खुलेको छ । ती हतियार प्रहरीले बरामद गरिसकेको जनाएको छ । अधिकारीविरुद्ध अंशुका बुबा नवीन गौतमले मोरङ प्रहरीमा किटानी जाहेरी दिनु भएको छ । पक्राउ परेका अधिकारीलाई नियन्त्रणमा लिएर प्रहरीले म्याद थप गरी अनुसन्धान जारी राखेको बताएको छ ।अंशुको आज नै धार्मिक संस्कार अनुसार सदगती गरिने परिवारले बताएका छन् ।
