काठमाडौं,२४ मंसिर । अर्थ मन्त्रालयअन्तर्गतको भन्सार विभागमा विभिन्न मागसहित भन्सार एजेन्ट महासंघ नेपालले देशभरिका भन्सार कार्यालयमा जारी राखेको ‘पेन डाउन’लगायत विरोध कार्यक्रम फिर्ता लिएको स्रोतले जनाएको छ । भन्सार विभाग र महासंघबीच छलफल भएपछि महासंघका माग सकारात्मक रूपमा सम्बोधन भएको जनाइएको छ ।
भन्सार एजेन्ट महासंघ नेपालले मंसिर २३ गतेदेखि देशभरका भन्सार कार्यालयहरूमा पेन डाउन र अन्य विरोधका कार्यक्रम सुरु गरेको छ। महासंघका अनुसार, भन्सार ऐन २०६४ मा समावेश गरिएका केही प्रावधानले भन्सार एजेन्टको पेसागत हकहित र काम गर्ने सहजतामा नकारात्मक असर पारेको थियो ।
साथै, अन्तर्राष्ट्रिय व्यापार सहजीकरण र सहयोगमा समेत नकारात्मक असर पु¥याउने वातावरण सिर्जना भएको महासंघको गुनासो गरेको थियो।
भन्सार विभागसँगको छलफलपछि माग सकारात्मक रूपमा सम्बोधन भएको र सोही कारण पेन डाउन कार्यक्रम फिर्ता भएको महासंघका अध्यक्ष प्राचीनकुमार वैद्यले बताँउनु भएको छ ।
यसैबीच भन्सार विभागले पनि महासंघका माग सम्बोधन भएको जानकारी दिएको हो। भन्सार विभागका अनुसार भन्सार एजेन्ट महासंघको विभिन्न किसिमका मागहरू भन्सार विभागमा पेस गरिएका थियो ।
जसअन्तर्गत व्यवस्थापन सुधार गर्ने, विभाग वा कार्यालयबाट सम्बोधन हुने र भन्सार ऐन तथा नियमावलीमा सम्बोधन गर्नुपर्ने प्रकृतिका उपयुक्त मागबारे विभागले अर्थलाई जानकारी दिएको थियो । उक्त मागका विषयमा अर्थले क्रमशःसम्बोधन गर्दै जाने निर्णय गरेको विभागद्धारा बुधबार जारी विज्ञप्तिमा उल्लेख छ ।
