दमक, २०, पुष । मुन्धुम तथा किरात ज्योतिष शास्त्रका प्रतिवादक रन्धोज नेम्वाङ‘रङसाङ’को प्रतिमा अनावरण गरीएको छ ।
उहाँको १०९ औ जन्मजयन्तीको अवसर पारेर उहाँको प्रतिमा अनावरणसाथै उहाँको जीवनीपरक कृति, मुल्याङन ग्रन्थ लोकापर्ण कार्यक्रम सम्पन्न गरीएको छ ।
शनिबार दमक ३ स्थित दुम्सेमा भव्य कार्यक्रमको आयोजना गरी नेम्वाङको व्यक्तित्वबारेमा चर्चा समेत गरीएको थियो ।
सो अवसरमा दमक नगरपालिकाकी उप प्रमुख रेगीना भट्टराई प्रसाईले साधक, मुन्धुम तथा किरात ज्योतिष शास्त्रका प्रतिवादन गरी समाज रुपान्तरण गर्ने महा अभियानमा नेम्वाङले पुर्याउनु भएको योगदानको चर्चा गर्नु भयो । यस्ता व्यक्तिको शालीक बनाएर सम्मान गर्ने काम स्थानीय सरकारलेनै गर्नुपर्ने भएपनि अहिले जसरी भइरहेको छ त्यसमा आफुहरुको समर्थन र साथ रहेको उल्लेख गर्नुभयो । उहाँले भन्नु भयो समाज रुपान्तरण गर्न, जात, धर्म र समुदाय केन्द्रितले मात्रै हुँदैन । यसले समग्र मानव जीवन र अवस्थामा परिवर्तन ल्याउन सक्नु पर्छ । र यो काम रन्धोज नेम्वाङ‘रङसाङ’बाट सम्भव भएको भन्दै उहाँले प्रशंषा गर्नु भयो ।
याक्थुङ नेम्वाङ समाज नेपालका केन्द्रिय अध्यक्ष प्रिया कुमार नेम्वाङको प्रमुख आतीथ्यतामा सम्पन्न भएको कार्यक्रममा बिभिन्न श्रष्टाहरुले रचना वाचन समेत गर्नु भएको थियो । साथै बिभिन्न कलाकारहरुले गीत तथा नृत्यहरु , हाकपारे समेत गाएर माहोललाई थप रमाईलो र स्मरणमय बनाएको श्री रन्धोज नेम्वाङ‘रङसाङ’ स्मृति प्रतिस्ठान शालिक निर्माण समितीका अध्यक्ष दल बहादुर नेम्वाङले जानकारी दिनुभयो ।
