धरान,२७ पुस । पूर्वमन्त्री तथा प्रगतिशील लोकतान्त्रिक पार्टी अध्यक्ष परिषद्का सदस्य सुदन किराती र धरान उपमहानगरपालिकाका मेयर हर्क साम्पाङबीच आइतबार भेटवार्ता भएको छ।
धरानको रमाइलो चोकस्थित होटल ह्वाइट डोभमा भएको भेटमा देशको राजनीतिक र आर्थिक संकट तथा त्यसको निकासबारे गम्भीर छलफल भएको किरातीले बताउनु भयो।
भेटवार्ता सकारात्मक रहेको र आगामी दिनमा पनि संवादलाई निरन्तरता दिने सहमति भएको दुवै पक्षले बताएका छन्। भेटका क्रममा हर्क साम्पाङ नेतृत्वको श्रम संस्कृति पार्टी र प्रगतिशील लोकतान्त्रिक पार्टीबीच सहकार्य गर्ने विषयमा पनि समझदारी बनेको छ। औपचारिक गठबन्धनबारे निर्णय नभए पनि राजनीतिक सहकार्यको ढोका खुला राख्ने सहमति भएको छ।
यसैबीच प्रगतिशील लोकतान्त्रिक पार्टीले आगामी प्रतिनिधि सभा निर्वाचनका लागि सुनसरी क्षेत्र नम्बर १ बाट सुदन किरातीको नाम उम्मेदवारका रूपमा सिफारिस गरेको छ।
उता धरानका मेयर साम्पाङले पनि सुनसरी १ बाट उठ्ने तयारी गर्नु भएको छ। सुदनलाई पार्टीको सुनसरी जिल्ला कार्यसमितिले फागुन २१ गते हुने निर्वाचनका लागि केन्द्रमा सिफारिस पठाएको छ।
२०७९ मंसिरमा भएको प्रतिनिधि सभा निर्वाचनमा किराती माओवादी केन्द्रका तर्फबाट भोजपुरबाट निर्वाचित हुनु भएको थियो। माओवादी केन्द्र विभिन्न वाम दलसँग एकीकृत भई नेकपा बनेपछि जनार्दन शर्मासँगै अलग भएका किराती हाल नवगठित प्रगतिशील लोकतान्त्रिक पार्टीमा हुनुन्छ। सुनसरी–१ धरान उपमहानगरपालिका समेटिएको क्षेत्र हो, जहाँ हर्क साम्पाङ मेयर हुनुन्छ। साम्पाङले आगामी निर्वाचनमा यही क्षेत्रमा उठ्ने तयारी गर्नु भएको छ ।
