विराटनगर,२७ पुस । आगामी फागुन २१ गते हुने प्रतिनिधि सभा निर्वाचनलाई लक्षित गरी कोशी प्रदेशका १४ वटै जिल्लामा निर्वाचन प्रहरीका लागि दरखास्त आह्वान गरिएको छ।
निर्वाचनलाई भयरहित र शान्तिपूर्ण वातावरणमा सम्पन्न गर्न प्रदेशभर कुल २३ हजार ४ सय ९ जना निर्वाचन प्रहरीको माग गरिएको छ। कोशी प्रदेश प्रहरी कार्यालय विराटनगरका प्रवक्ता एसएसपी दीपक पोखरेलका अनुसार इच्छुक नेपाली नागरिकहरूले शुक्रबारदेखि प्रदेशका १४ वटै जिल्ला प्रहरी कार्यालयहरूमा पुगेर आवेदन फारम भर्न थाली सकेका छन्।
सबैभन्दा बढी मोरङ जिल्लामा ४ हजार ३ सय ८३ र सबैभन्दा कम तेह्रथुम जिल्लामा ५ सय ५० जना म्यादी प्रहरीको कोटा निर्धारण गरिएको हो। निर्वाचन अवधिभरका लागि भर्ना गरिने यी निर्वाचन प्रहरीले सुरक्षा व्यवस्थामा नेपाल प्रहरीलाई सहयोग गर्नेछन्। आवेदनका लागि तोकिएको योग्यता पुगेका १८ वर्ष पूरा भई ५४ वर्ष ननाघेका नागरिकले सम्बन्धित जिल्ला प्रहरी कार्यालयमा सम्पर्क राख्न सक्ने प्रवक्ता पोखरेलले जानकारी दिनु भयो ।
नागरिक प्रहरी (जिल्लागत सूची)
१. मोरङः ४,३८३ जना
२. झापाः ४,३०८ जना
३. सुनसरीः ३,१४९ जना
४. ईलामः १,६३४ जना
५. उदयपुरः १,४४६ जना
६. खोटाङः १,१८६ जना
७. पाँचथरः १,१३१ जना
८. भोजपुरः १,००१ जना
९. धनकुटाः ९८९ जना
१०. संखुवासभाः ९८८ जना
११. ओखलढुङ्गाः ८७७ जना
१२. सोलुखुम्बुः ८५१ जना
१३. ताप्लेजुङः ८४६ जना
१४. तेह्रथुमः ५५० जना
कुल जम्माः २३,४०९ जना
