पथरी, २८ पुस l उत्तरपूर्वी मोरङको पथरी शनिश्चरे नगरपालिकास्थित पथरी बजार क्षेत्रमा चारलेन मात्रको सडक बन्ने प्रसंग अघि बढेपछि स्थानीयले ६ लेनकै सडक बन्नुपर्ने माग अघि सारेका छन् ।
सडकको ८२ मिटर क्षेत्रमा पर्ने संरचना हटाउनका लागि १ नम्बर वडा कार्यालयले ३५ दिने सूचना गर्ने निर्णय अनुरुप आज सूचना जारी भएको छ । एशियन हाइवे परियोजनालाई ५० मिटर अर्थात ६ लेनकै सडक निर्माणमा ध्यानाकर्षण गराइने सर्वपक्षीय भेलाले निर्णय गरेको छ । वडाअध्यक्ष भीमकुमार राईको अध्यक्षताको दल तथा विभिन्न सरोकारवालाहरुको भेला सम्पन्न भएको छ । भेलाले सर्वपक्षीय १३ सदस्यीय समितिले गत भदौमा कार्यालयसँग भएको सहमति अनुरुप सडक परियोजनाको कार्यालय इटहरीमा ध्यानाकर्षण गराउने निर्णय भएको समितिका संयोजक एवम् वडाअध्यक्ष राईले जनाउनु भयो ।
समितिका सदस्यहरुमा पथरी उद्योग वाणिज्य संघका अध्यक्ष दीपक बस्नेत, एमालेकातर्फबाट पूर्व वडाध्यक्ष बाबुराम एङ्देन, वडा सदस्य पूर्णबहादुर कार्की, कांग्रेसका दुर्गाप्रसाद भट्टराई, नेकपाका तुलसी ढकाल, रास्वपाका मोहनकुमार श्रेष्ठ, प्रभावित क्षेत्रसहितका प्रतिनिधिहरु विजय डाँगी, राजेन्द्र भण्डारी, रुपनारायण भट्टराई, राजन तिम्सिना, विजय श्रेष्ठ, शान्ति सामुदायिक वनका कुलमणि गुरुङ रहनु भएको छ ।
पथरी शनिश्चरे नगरपालिकाका प्रमुख मोहनप्रसाद तुम्वापोको अध्यक्षतामा सम्पन्न नगर कार्यपालिका बैठकले पनि पथरी बजार क्षेत्रमा ५० मिटरको सडक कायम गर्नुपर्ने विषयलाई जोड दिएको छ ।
कार्यपालिका बैठक अघि वडा नं. १ को आयोजनामा सर्वदलीय बैठक गरी एसियन हाइवे अन्तर्गत पथरी क्षेत्रमा सडकको चौडाइ ५० मिटर कायम गर्नुपर्ने मागसहित एसियन हाइवे कार्यालयमा सर्वदलीय एवम् सर्वपक्षीय डेलिगेसन जाने निर्णय गरिएको वडा नम्बर १ का अध्यक्ष भीम राईले बैठकमा जानकारी गराउनुभयो । वडाले ३५ दिने सूचना जारी गरेर बजारको सडक क्षेत्रमा पर्ने घर टहरा हटाउन जानकारी गराउने र सडक आयोजनालाई पूर्वनिर्धारित योजना अनुसारनै ५० मिटरको सडक कायम गर्न ध्यानाकर्षण गराउने छलफलले निर्णय गरेको थियो ।
कार्यपालिका बैठकमा योजना तथा कार्यक्रम संशोधन, जग्गा वर्गीकरण, नगरको वधशाला र नाट्यशाला निर्माण साथै जिरीखिम्तीको सडकको नक्सा र सकडको अवस्थितिको समस्या, त्यहाँको डाँस खोला क्षेत्रमा टनेल पुल निर्माण सम्बन्धी विषयमा व्यापक छलफल गरिएको थियो ।
अघिल्लो बैठकले नगरपालिकाको नगरसभा माघ ११ गते गर्ने निर्णय गरेको भए पनि सोही दिन राष्ट्रिय सभाको निर्वाचन तय भएकाले नगरसभाको मिति परिवर्तन गरी माघ १४ गते गर्ने निर्णय गरिएको छ ।
