झापा ,१ माघ । झापाको कनकाई नगरपालिकामा आज भएको सवारी दुर्घटनामा एकजनाको ज्यान गएको छ भने १३ जना घाइते भएका छन्। कनकाई नगरपालिका वडा नम्बर ३ नयाँ बस्तीस्थित पूर्व–पश्चिम लोकमार्गमा बिर्तामोडबाट माईधारतर्फ आउदै गरेको मे १ च ४५१५ नम्बरको पिकअप गाडी र माईधारबाट बिर्तामोडतर्फ आउँदै गरेको ना ५ ख २१४९ नम्बरको बस आपसमा ठक्कर खाँदा दुर्घटना भएको हो।
दुर्घटनामा भद्रपुर नगरपालिका निवासी आफुद राजवंशीका १ वर्ष ६ महिनाका छोरा आरुति राजवंशीलाई अस्पताल ल्याइपु¥याउनेबित्तिकै चिकित्सकले बिहान १० बजेर १५ मिनेटमा मृत घोषणा गरेका छन्। दुर्घटनामा पिकअप गाडीमा सवार अन्य यात्रुहरू घाइते भएका हुन । घाइते मध्ये मेचिनगर नगरपालिका–१५ की पैसठी वर्षीया फुलमुन्नि मुर्मु, बयालीस वर्षीया जमुना राजवंशी र ११ वर्षीय अनिष राजवंशीको अवस्था सामान्य रहेको र उनीहरूको बिर्तामोडस्थित बी एण्ड सी अस्पतालमा उपचार भइरहेको प्रहरीले जनाएको छ।
त्यस्तै, अन्य घाइतेहरूको बिर्तासिटी अस्पताल बिर्तामोडमा उपचार भइरहेको छ। घाइतेमध्ये पुस्पलाल राजवंशी, टेमुना राजवंशी र अन्जलि राईको अवस्था मध्यम रहेको छ भने आफुद राजवंशी, उनकी श्रीमती सुस्मा राजवंशी र पाथल राजवंशीको अवस्था गम्भीर रहेको अस्पतालले जनाएको छ। अन्य केही घाइतेहरूको अवस्था सामान्य छ।
दुर्घटनामा संलग्न पिकअप चालक बिर्तामोड नगरपालिका–६ का ३९ वर्षीय जाकिर हुसेन प्रहरी नियन्त्रणमा छन्। बस चालक भने फरार रहेकाले खोजी कार्य जारी रहेको जिल्ला प्रहरीले जनाएको छ। दुवै सवारी साधन प्रहरीले नियन्त्रणमा लिएको छ।
