दमक, २ माघ । हर्क साम्पाङ नेतृत्वको श्रम संस्कृती पार्टीले झापा निर्वाचन क्षेत्र नम्बर–५ बाट प्रतिनिधि सभा सदस्यका लागि उम्मेदवारी घोषणा गरेको छ। पार्टीले समिर तामाङलाई उम्मेदवार बनाउने निर्णय सार्वजनिक गरेको हो। श्रम संस्कृती पार्टीका अध्यक्ष हर्क साम्पाङले सामाजिक सञ्जाल फेसबुकमार्फत उम्मेदवार सार्वजनिक गर्दै मतदातासँग अपिल गर्नुभएको छ।
उहाँले अञ्जुलीमा रहेको माटो चुनाव चिन्हमा अत्याधिक मत दिई बहुमतका साथ जिताइदिन झापा–५ का आमा, बुबा, दाजुभाइ तथा दिदीबहिनीहरूलाई बिनम्र अनुरोध गर्नुभएको छ। साम्पाङले आफ्नो सन्देशको अन्त्यमा “जय माटो, जय देश” भन्ने नारा पनि उल्लेख गर्नुभएको छ। आगामी प्रतिनिधि सभाको निर्वाचन २१ फागुनमा हुँदैछ। झापा–५ लाई लामो समयदेखि एमालेको पकड रहेको क्षेत्रका रूपमा हेरिँदै आएको छ। यस क्षेत्रबाट एमाले अध्यक्ष तथा पूर्व प्रधानमन्त्री केपी शर्मा ओलीले निरन्तर फराकिलो मतान्तरसहित निर्वाचन जित्दै आउनुभएको छ। यसैबीच, झापा–५ मा चुनावी माहोल थप चासोपूर्ण बन्दै गएको छ। राष्ट्रिय स्वतन्त्र पार्टीका तर्फबाट युवामाझ लोकप्रिय देखिएका काठमाडौं महानगरपालिकाका मेयर बालेन्द्र साहले पनि यहाँबाट निर्वाचन लड्न सक्ने सम्भावनाबारे चर्चा भइरहेको छ। नयाँ र पुराना राजनीतिक शक्तिहरूको सम्भावित प्रतिस्पर्धाका कारण झापा–५ को चुनाव यसपटक अझै रोचक हुने देखिएको छ।
