पथरी शनिश्चरे, ४ माघ / मौलिक संस्कृति संरक्षणमा जुटेको मोरङको पथरी शनिश्चरे वडा नम्बर ३ मा रहेको पाभीभरा नौमती बाजा समूहले देउसी – भैलो कार्यक्रमबाट १ लाख ६८ हजार बढी रकम बचत गरेको छ ।
स्थानीय जलेश्वर शिवालय मन्दिरमा नौमती बाजा समूह र नौमती बाजा संरक्षण समितिद्वारा एक कार्यक्रमको आयोजना गर्दै आय व्यय सार्वजनिक गर्दै सो विवरण प्रस्तुत गरेको हो ।
समूहका सचिव दीपक ढुङ्गानाले नौमति बाजा बजाएर खेलेको देउसी भैलोबाट २ लाख ६८ हजार १ सय २६ रूपैयाँ बराबरको कुल आम्दानी र खर्च कटाएर १ लाख ६८ हजार १ सय २७ रूपैयाँ बचत भएको जानकारी गराउनु भयो । पाथीभरा नौमती बाजा समूहकी अध्यक्ष तेजमाया कार्कीको अध्यक्षतामा सम्पन्न कार्यक्रममा संरक्षण समिति संयोजक युवराज बास्कोटाले जेनतेन संस्था रोपिएकोले यो संस्थालाई अझै फलाउने र फुलाउने जिम्मेवारी समितिमा रहेका मानिसहरूको प्रमुख भूमिका रहने उल्लेख गर्नुभयो । पथरी शनिश्चरे क्षेत्रमा सामाजिक संस्कृतिको विकास गर्दै उहाँले मादल, ढोलक, च्याब्रुङ, डम्फु, जस्तै नौमती बाजालाई संरक्षण गर्न पनि सबैले खट्नु पर्ने कुरामा जोड दिनुभयो ।
सो अवसरमा संरक्षण समितिका सचिव घनश्याम भट्टराई, सदस्य राजकुमार गेलाल, घनश्याम अधिकारी, लगायतले आआफ्ना विचार व्यक्त गर्नुभयो । पाथीभरा नौमती बाजा समूहलाई जीवन्त तुल्याउनका लागि विधान संशोधन कार्यदल समिति निर्माण गर्ने र पुरानो समितिलाई विगठन गर्ने पनि छलफल भएको थियो ।
नयाँ विधान संशोधन कार्यदल समितिमा निम्न सदस्य रहनुभएको छ । तेजमाया कार्कीको संयोजकत्वमा राजकुमार गेलाल, घनश्याम भट्टराई, मुक्ति अधिकारी र इन्द्र गौतम सदस्य चयन हुनुभएको छ । सो समितिका सदस्य सबै आजीवन समदस्य समेत रहनु भएको छ । सो अवसरमा समितिका क्रियाशील सदस्यहरूलाई रुद्राक्ष माला, खाँदा र अविरले सम्मानित गरिएको थियो । १ हजार ५ रूपैयाँ सहयोग दान गर्नुहुने महानुभावहरूलाई आजीवन सदस्य र ५ सय रुपैयाँ माथि सहयोग दिनुहुने दाताहरूलाई संस्थाको सदस्यता प्रदान गर्ने सो समितिका सचिव दीपक ढुंगानाले जानकारी दिनुभयो ।
