विराटनगर,२१ माघ । काठमाडौं महानगरपालिकाका प्रमुख तथा राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र साह (बालेन) विराटनगर आएर सुनसरीतर्फ लाग्नु भएको छ ।
मोरङको रंगेली हुँदै केही बेरअघि विराटनगर आएर उहाँ सुनसरी जानु भएको हो । जिल्ला दौडाहाअन्तर्गत बुधबार बिहान मोरङको उर्लाबारीबाट सुरु भएको उहाँको यात्रा पथरीशनिश्चरे, लेटाङ, रंगेली हुँदै विराटनगर प्रवेश गरेको थियो ।
बालेनले विराटनगरमा कार्यकर्ता, समर्थक तथा उम्मेदवारहरुसँग सामान्य छलफल तथा भेटघाट गर्नु भएको छ । बालेनको विराटनगर आगमनलाई स्थानीय राजनीतिक वृत्तले चासोका साथ हेरिरहेको छ।
विभिन्न स्थानमा भेटघाट कार्यक्रममा सीमित समय निकाल्दै उहाँले पार्टी संगठन विस्तार, आगामी राजनीतिक रणनीति र स्थानीय तहका समस्या तथा सम्भावनाका बारेमा सामान्य संवाद गर्नु भएको थियो । बालेन थोरै समय मात्रै विराटनगरमा रहेर सुनसरीतर्फ प्रस्थान गरेको उहाँको सचिवालयले बताएको छ ।
यसअघि बिहान उर्लाबारीमा स्थानीय युवा र नागरिक अगुवासँग भएको छलफलमा बालेनले सुशासन, पारदर्शिता र नागरिक सहभागितालाई विकासको मूल आधारका रूपमा प्रस्तुत गर्नु भएको थियो । राज्य संयन्त्रमा व्याप्त बेथिति, अनावश्यक खर्च र जवाफदेहिताको अभावका बारेमा कडा टिप्पणी गर्दै उहाँले नागरिक स्वयं सचेत र सक्रिय नभएसम्म वास्तविक परिवर्तन सम्भव नहुने धारणा राख्नु भएको थियो ।
स्थानीय तह बलियो बने मात्र संघीय संरचनाको औचित्य पुष्टि हुने उहाँको भनाइ थियो । उर्लाबारीपछि पथरीशनिश्चरे, लेटाङ र रंगेली हुँदै विराटनगर आइपुग्नु भएको थियो । बालेनले कार्यकर्ता र सम्भावित उम्मेदवारसँग संगठनात्मक विषयमा सामान्य छलफल गर्नु भएको छ ।
दौडाहाका क्रममा स्थानीय राजनीतिक अवस्था, आगामी निर्वाचन तयारी, संगठन सुदृढीकरण र मतदातासँग प्रत्यक्ष सम्बन्ध विस्तारका विषयहरू बुझ्ने गर्नु भएको छ । विराटनगरबाट हिँडिसकनु भएको बालेन दुहबी हुँदै इटहरी पुग्ने तालिका रहेको छ ।
इटहरीमा करिब डेढ घण्टा कार्यकर्ता र उम्मेदवारसँग विस्तृत छलफल गर्ने कार्यक्रम तय गरिएको छ । त्यसपछि मध्याह्न १२ बजे इटहरीबाट इनरुवा र साढे १२ बजेपछि बराहक्षेत्रतर्फ प्रस्थान गर्ने कार्यतालिका रहेको छ । बराहक्षेत्रको कार्यक्रम सम्पन्न गरेपछि उहाँको अन्तिम गन्तव्य उदयपुर हुने । उदयपुरमा उहाँ आजै दिउँसो ४ बजेसम्म पुग्ने बताइएको छ ।
दौडाहाका क्रममा बालेनले कार्यकर्ता भेटघाट, उम्मेदवारसँग छलफल र मतदातासँग प्रत्यक्ष अन्तक्र्रिया गर्ने कार्यक्रमलाई प्राथमिकतामा राख्नु भएको छ । पार्टी संगठनलाई जरैदेखि मजबुत बनाउने, स्थानीय मतदाताको भावना बुझ्ने र राजनीतिक विकल्पका बारेमा प्रत्यक्ष संवाद गर्ने उद्देश्यसहित जिल्ला दौडाहालाई उहाँले व्यापक बनाउनु भएको छ ।
प्रायः मौन रहने बालेनको व्यवहारिक दृष्टिकोण र नागरिक केन्द्रित राजनीतिक धारले परम्परागत राजनीतिमा नयाँ बहस सिर्जना गरिरहेको छ । विभिन्न स्थानको दौडाहालाई पनि यही सन्दर्भमा अर्थपूर्ण रूपमा हेरिएको छ ।
बालेनले झापाको निर्वाचन क्षेत्र नम्बर ५ मा रास्वपाबाट प्रतिनिधिसभा सदस्यका लागि उम्मेदवारी दिनु भएको छ। नेकपा (एमाले)का अध्यक्ष एवं पूर्वप्रधानमन्त्री केपी शर्मा ओलीसँग चुनावी प्रतिस्पर्धामा उत्रिएपछि बालेनको चर्चा व्यापक बनेको छ ।
