मोरङ,२२ माघ । नेपाली समाजमा आमाको माया, त्याग र संघर्षलाई गहिरो भावनात्मक रूपमा प्रस्तुत गर्ने चलचित्र “आ बाट आमा” को सम्पूर्ण टोली हिजो मोरङ जिल्लाको लेटाङ नगरपालिका–२, बुधबारेस्थित मोरङ पाथिभरा इङ्ग्लिस स्कुल मा उपस्थित भएको छ।
विद्यालय परिसरमा आयोजित विशेष कार्यक्रममा चलचित्रका कलाकार तथा स्रष्टाहरूलाई विद्यार्थी, अभिभावक र शिक्षक–शिक्षिकाहरूले हार्दिक स्वागत तथा सम्मान व्यक्त गरेका थिए। कार्यक्रममा चलचित्रका निर्देशक चन्द्र पन्त, कलाकारहरू पल शाह, बिपना थापा, प्रदीप रावत, सिम्रन पन्त, उषा उप्रेती लगायत “आ बाट आमा” परिवारको उल्लेखनीय उपस्थिति रहेको थियो।
कार्यक्रमलाई सम्बोधन गर्दै वक्ताहरूले चलचित्र “आ बाट आमा” कुनै बनावटी कथा नभई आमाको काखबाट सुरु भएको जीवनको यथार्थ कथा भएको उल्लेख गरे। आमाको मौन संघर्ष, थकान, ममता र बलिदानलाई चलचित्रले जीवन्त रूपमा प्रस्तुत गरेको भन्दै उपस्थित दर्शकहरू भावुक बनेका थिए।
कार्यक्रममा विद्यालयका विद्यार्थीहरूले पनि सांस्कृतिक प्रस्तुति प्रस्तुत गरेका थिए। विशेष गरी विद्यालयका नृत्य शिक्षक प्रभिन विश्वकर्मा को निर्देशनमा तयार भएको टिम ग्रिसमको ऊर्जाशील नृत्य प्रस्तुतिले दर्शकहरूको मन जित्न सफल भयो।
विद्यालय परिवारले यस्ता प्रेरणादायी चलचित्र टोलीको उपस्थितिले विद्यार्थीहरूमा संस्कार, संवेदना र पारिवारिक मूल्यप्रति सकारात्मक सन्देश प्रवाह हुने विश्वास व्यक्त गरेको छ। कार्यक्रममा विद्यार्थी, अभिभावक तथा स्थानीय समुदायको उल्लेखनीय सहभागिता रहेको थियो।
