दमक,२९ माघ, २०८२। नेकपा एमाले झापा क्षेत्र नं. ५ का निर्वाचन परिचालन समितिका संयोजक देवेन्द्र दाहालले आगामी निर्वाचनमा एमालेको जीत राष्ट्रिय आवश्यकता रहेको बताउनु भएको छ । बिहिबार दमकमा सञ्चारकर्मीहरुसँग भएको अन्तरक्रियामा एमाले केन्द्रिय सदस्य समेत रहनु भएका दाहालले राष्ट्रियताको संरक्षण, पूर्वाधार विकास र आर्थिक समृद्धीका लागि एमालेले जित्न जरुरी रहेको उहाँले बताउनु भएको हो ।
यस्तै उहाँले नेकपा एमाले जनताका प्रश्नबाट भाग्ने पार्टी नभएको समेत प्रष्ट पार्नु भयो । उहाँले भन्नुभयो, ‘मतदाताले आफ्ना कुरा उम्मेद्वार र पार्टीसँग प्रष्टसँग राख्न पाउनु पर्छ र चित्तबुझ्दो जवाफ खोज्नु पनि उनीहरुको अधिकार हो । त्यसैले हामी जनताका प्रश्नबाट भाग्दैनौं, हामीलाई र हाम्रा उम्मेद्वारलाई जनतासँग छलफल र भलाकुसारीगर्न कुनै समस्या छैन ।’
राष्ट्रियताको सवालमा एमाले तथा अध्यक्ष ओलीले लिएको अडानका कारण पनि देशै भरि एमालेनै जनताको पहिलो रोजाई रहेको उहाँले जनाउनुभयो । नाकाबन्दी विरुद्ध निर्वाह गरेको जिम्मेवारी तथा लिपूलेक, कालापानी, लिम्पियाधुरा नेपालका नक्सामा समेट्ने कामबाट राष्ट्रियताको सवालमा एमाले भन्दा बलियो पार्टी र अध्यक्ष ओली भन्दा अडानको नेता अर्को नभएको नेपाली जनताले बुझेको नेता दाहालले बताउनुभयो ।
अहिलेको सरकार विकाश बिरोधी
पूर्व भौतिक पूर्वाधार तथा यातायात मन्त्री समेत रहनु भएका नेता दाहालले अहिलेको सरकार विकास बिरोधी देखिएको बताउनु भयो । ओली नेतृत्वको सरकारका बेलामा जारी गरिएको बजेटका महत्वपूर्ण योजनाहरु कटौती गरेर, योजना रोक्का गरेर सरकारले विकाश बिरोधी चरीत्र देखाएको उहाँले जनाउनुभयो । यस्तै सुकुमबासीहरुलाई धनीपूर्जा वितरणको काम भई रहेको समयमा आयोगनै विघटन गरेर सरकार भुमिहिन तथा सुकुमबासीहरुको बिपक्षमा छ भन्ने पुष्टि भएको उहाँले जनाउनुभयो । अदालतको आदेशबाट आयोग व्युतिए पनि सरकारको असहयागका कारण काम हुन नसकेको नेता दाहालको दावि छ ।
सुकुमबासी बस्तिमा डोजर चलाउनेले भ्रम छर्दैछन्
काठमाडौमा सुकुमबासीका बस्तिमा डोजर चलाउनेहरुले झापामा आएर सुकुमबासी समस्या समाधान गर्छौं भनेको कुरा भ्रमपूर्ण रहेको झापाली जनताले बुझि सकेको नेता दाहालको भनाई थियो । एमाले अध्यक्ष ओली पहिलो चरणको भेटघाट सकेर काठमाडौ फर्कनु भएको छ । घोषणा पत्रको तयारी सकेर पुनः उहाँ झापा आउनु हुने निर्वाचन प्रचार उपसमितिका संयोजक एवम् एमाले केन्द्रिय सदस्य ईन्द्र भण्डारीले जानकारी दिनुभयो ।
