दमक,४ फागुन।राष्ट्रिय स्वतन्त्र पार्टीका वरिष्ठ नेता तथा झापा क्षेत्र नम्बर ५ का उम्मेदवार बालेन्द्र शाह (बालेन) ले काठमाडौँको फोहोर व्यवस्थापन र सुकुम्बासी समस्या समाधानमा ठूलो अन्तर्राष्ट्रिय चलखेल हुने गरेको दाबी गर्नु भएको छ।
सोमबार बिहान झापा ५ का मतदातासँगको संवादमा, काठमाडौँ महानगरपालिकाका पुर्वमेयर समेत रहनु भएका बालेनले महानगरको राजनीतिमा बाह्य शक्तिहरूको अदृश्य दबाब निरन्तर रहने गरेको बताउनु भयो। उहाँका अनुसार काठमाडौँ महानगरको नेतृत्व गर्नु प्रधानमन्त्री हुनुजत्तिकै चुनौतीपूर्ण अनुभव हो।
सुकुम्बासी व्यवस्थापनका क्रममा आफूले ठूलो दबाब र अवरोध झेल्नुपरेको उल्लेख गर्दै बालेनले काठमाडौँका सुकुम्बासी बस्तीमा बस्ने धेरै मानिस वास्तविक सुकुम्बासी नभई राजनीतिक दलद्वारा संरक्षित रहेको जिकिर गर्नु भएको छ। उहाँले सुकुम्बासीलाई लालपुर्जा दिलाउन भूमि आयोगसँग सम्झौता भइसके पनि राजनीतिक अस्थिरताका कारण काम कार्यान्वयन हुन नसकेको बताउनु भयो।
खोला किनारमा बस्नु जोखिमपूर्ण भएकाले सुकुम्बासीलाई सुरक्षित स्थानमा स्थानान्तरण गरी आवास र खानपानको व्यवस्था गर्ने योजना रहेको बालेनको भनाइ छ। आफूले सुरु गरेका सुधारलाई राष्ट्रिय स्तरमा लैजान प्रतिनिधिसभा चुनाव लडेको उहाँले स्पष्ट पार्नु भयो।उहाँले मतदातासँग प्रत्यक्ष भेटघाट गर्दै आफ्ना एजेण्डाहरू सुनाउन थालेपछि झापा ५ को चुनावी प्रतिस्पर्धा थप रोचक बनेको छ ।
मधेस र बागमती प्रदेशको भ्रमण सकेर निर्वाचन क्षेत्र फर्किनु भएको बालेनले झापा ५ मा घरदैलो अभियान तीव्र बनाउनु भएको छ्, जससँगै यहाँको चुनावी प्रतिस्पर्धा थप चर्किँदै गएको छ।
