झापा,१३ फागुन ।झापा ५ मा निर्वाचन सुरक्षालाई कडा बनाउँदै नेपाल प्रहरीले पाँच जना डीएसपी खटाएको छ। नेकपा एमालेका अध्यक्ष केपी शर्मा ओली र राष्ट्रिय स्वतन्त्र पार्टीका वरिष्ठ नेता बालेन शाह उम्मेदवार रहेको यस क्षेत्रमा सुरक्षा व्यवस्थालाई उच्च प्राथमिकता दिइएको हो। इलाका प्रहरी कार्यालय दमकमा रहेको एक डीएसपीको दरबन्दी बाहेक गृह मन्त्रालयले थप चार जना डीएसपी पठाएको छ।
झापा ५ का सबै पालिकामा डीएसपीको कमाण्डमा प्रहरी परिचालन गरिएको छ। गौरीगञ्ज, गौरादह र कमलमा पनि डीएसपीकै नेतृत्वमा सुरक्षा व्यवस्था मिलाइएको छ। झापा ५ मा मात्रै दुई हजार भन्दा बढी सुरक्षाकर्मी परिचालन गरिएको छ। यसअघि तैनाथ सुरक्षाकर्मीका अतिरिक्त कोशी प्रदेश प्रहरी कार्यालयबाट करिब सय जना प्रहरी ल्याइएको थियो भने केही दिनअघि चार जना डीएसपी सहित ठूलो संख्यामा प्रहरी गृह मन्त्रालयबाट खटाइएको छ।
झापा प्रहरी प्रमुख एसपी बसुन्धरा खड्काका अनुसार निर्वाचनलाई लक्षित गरी झापामा प्रहरी तीन गुणा थप गरिएको छ र निर्वाचन गराउन पर्याप्त सुरक्षा व्यवस्था रहेको छ। यसैबीच, झापामा थप एक जना एसपी आउने चर्चा भए पनि हालसम्म आइपुगेका छैनन्।
