मोरङ,१५ फागुन ।पूर्व–पश्चिम राजमार्गअन्तर्गत मोरङको सुन्दरहरैँचा नगरपालिका–७ स्थित ठडिया चोक नजिकै एक जना वृद्ध मृत फेला परेको प्रहरीले जनाएको छ । मृत भेटिनेमा सुन्दरहरैँचा–७ का करिब ६५ वर्षीय लोक बहादुर भुजेल रहेका छन् ।
ठडिया चोकबाट करिब ५ सय मिटर पूर्व सडक किनारमा शुक्रबार बिहान ११ः३० बजेतिर उनको शव फेला परेको प्रहरीले बताएको छ । मृतक भुजेलको दुवै खुट्टामा चोट लागेको र घटनास्थलको प्रकृति हेर्दा सवारीसाधनको ठक्करबाट उनको मृत्यु भएको हुनसक्ने प्रहरीको प्रारम्भिक अनुमान गरेको छ ।
प्रहरीका अनुसार भुजेल परिवारमा एक्लै बस्दै आएका थिए । उनले प्लास्टिक, बोतल र कागज सङ्कलन गरी कबाडीलाई बेचेर आफ्नो गुजारा चलाउँदै आएका थिए । मोरङ प्रहरीका प्रवक्ता डीएसपी हरिनन्दन चौधरीले घटनाको प्रकृतिले सवारी दुर्घटनाको सङ्केत गरे पनि ठक्कर दिने सवारीसाधनको भने पहिचान हुन नसकेको जानकारी दिनु भयो ।
‘सवारीको ठक्करबाट भुजेलको मृत्यु भएको जस्तो देखिन्छ,’ डीएसपी चौधरीले भन्नु भयो, ‘दुर्घटना गराएर फरार रहेको सवारीसाधनको पहिचानका लागि खोजी कार्य तीव्र पारिएको छ ।’
इलाका प्रहरी कार्यालय बेलबारीका प्रहरी निरीक्षक इन्सपेक्टर राजीव गिरी नेतृत्वको टोलीले घटनास्थलको कानुनी प्रक्रिया पूरा गरी शवलाई पोस्टमार्टमका लागि पठाएको प्रहरीले जनाएको छ । घटनाबारे थप अनुसन्धान भइरहेको र पोस्टमार्टम रिपोर्ट तथा विस्तृत अनुसन्धानपछि मात्रै वास्तविक तथ्य खुल्ने प्रहरीले बताएको छ ।
