मोरङ,१६ फागुन । राष्ट्रिय स्वतन्त्र पार्टी (रास्वपा) का भ्रष्टाचार निवारण विभाग प्रमुख तथा प्रदेश सदस्य, मोरङ क्षेत्र नम्बर २ का पूर्व उम्मेदवार ठगेन्द्र प्रसाद न्यौपानेले पार्टी परित्याग गर्नु भएको छ । शुक्रबार साँझ औपचारिक रूपमा पार्टी छाडेका उहाँले शनिबार विराटनगरमा पत्रकार सम्मेलन गर्दै रास्वपा ‘सिक्किमीकरण’को दिशातर्फ उन्मुख भएको गम्भीर आरोप लगाउनु भएको छ ।
लामो समयदेखि कृषक सशक्तीकरण र ‘माटो फुलाउने’ अभियानमा सक्रिय न्यौपानेले देशको राष्ट्रिय राजनीतिमा बढ्दो संकट देखिएकाले अब माटो जोगाउने आन्दोलनको आवश्यकता महसुस भएको बताउनु भयो । सोही उद्देश्यले आफू राष्ट्रवादी धारमा उभिँदै नेपाल कम्युनिष्ट पार्टी (एमाले) रोजेको उहाँले घोषणा गर्नु भयो ।
पार्टी नेतृत्वप्रति असन्तुष्टि जनाउँदै उहाँले रवि लामिछाने र बालेन्द्र शाह तर्फ संकेत गर्दै पार्टीका नेतृत्व तह ‘फ्री फायर र पब्जीका सिपाहीजस्ता’ भएको टिप्पणी गर्नु भएको छ । उहाँका अनुसार वर्तमान नेतृत्व राष्ट्र र जनताप्रति जिम्मेवार नभई भावनात्मक र अपरिपक्व ढंगले अघि बढिरहेको छ ।
न्यौपानेले इटहरीमा सम्पन्न एक बैठकमा आफूले नै आगामी परिस्थितिबारे चेतावनी दिएको स्मरण गर्दै अहिलेका उम्मेदवारहरू अन्य कुनै शक्तिबाट निर्देशित भएको अनुभूति भएको बताउनु भएको छ । टिकट वितरण प्रक्रियामा देखिएको अपारदर्शिता र आन्तरिक असन्तुलनप्रति पनि उनले तीव्र असन्तोष व्यक्त गर्नु भएको छ ।
‘सिक्किमीकरण’को प्रसंग जोड्दै उहाँले सिक्किमका मतदाताले मतदानमार्फत नै भारतमा विलय भएको ऐतिहासिक उदाहरण स्मरण गराउनु भएको छ । अहिले रास्वपाका उम्मेदवारहरूको व्यवहार र राजनीतिक शैलीले त्यस्तै जोखिमको संकेत गरेको उहाँको दाबी छ । मतदातालाई सचेत रहन आग्रह गर्दै उहाँले प्रतिनिधि वा दलको पृष्ठभूमि, विचार र जिम्मेवारीबोध बुझेर मात्र मतदान गर्न अनुरोध गर्नु भएको छ।
एमाले रोज्नुको कारण स्पष्ट पार्दै उनले पार्टी अध्यक्ष केपी शर्मा ओलीले २०७४ सालको नाकाबन्दीका बेला लिएको राष्ट्रवादी अडान र ‘समृद्ध नेपाल, सुखी नेपाली’ अभियानले आफूलाई आकर्षित गरेको बताउनु भयो । दक्षिण कोरियाको सहज जीवन छोडेर देश निर्माणका लागि फर्किएको सिपाही भएको उल्लेख गर्दै उहाँले ओलीविरुद्ध भइरहेका आलोचना र आरोपहरूलाई अतिरञ्जित र योजनाबद्ध भएको जिकिर गर्नु भएको छ ।
उहाँले राजनीति आफ्नो लागि पद वा प्रतिष्ठाको विषय नभई किसान र माटोको समस्या राज्यको नीतिमा स्थापित गर्ने माध्यम भएको स्पष्ट पार्नु भएको छ।
