दमक ,१६ फागुन, २०८२। फागुन २१ का लागि तोकिएको प्रतिनिधिसभा निर्वाचन नजिक आई रहेका बेला विदेश गएकाहरु पनि मतदानका लागि आउने क्रम बढेको छ । यसै क्रममा विभिन्न देशमा रहेका झापाको क्षेत्र नं. ५ का मतदाताहरु आउने क्रम बढेको छ ।
झापाको कमल ६ का रमेश ओझा पनि केहि दिन अघि दक्षिण कोरीयबाट आई पुग्नु भएको छ । यस अघिका निर्वाचनमा रोजगारीका लागि बाहिर रहनु परेकाले मतदान गर्न नपाएको अनुभव उहाँसग छ । तर यस पटक भने पहिलो पटक मतदान गर्न आतुर रहेको र देश बनाउनेलाई मतदान गर्न आएको उहाँले बताउनुभयो । उहाँले भन्नुभयोे, ‘मतदान त आफ्नो इच्छाको कुरा हो, मन लागेकालाई दिईन्छ । तर आफ्नो अमुल्य मत खेर नजाओस् भनेर देश जलाउनेलाई होईन बनाउनेलाई दिने विचारमा छु ।’
यस्तै कमल ७ का खड्ग सम्बाहम्फे पनि चुनावको मुखमा जापानबाट आई पुग्नु भएको छ । लोकतान्त्रिक व्यवस्थालाई बलियो बनाउन निर्वाचनको महत्वपूर्ण भुमिका हुने भएकाले आफ्नो मताधिकारको प्रयोगका लागि आएको उहाँले बताउनुभयो । ‘विदेशको ठाउँ, सवैलाई भन्ने वित्तिकै विदा नमिल्न पनि सक्छ’ उहाँले भन्नुभयोे, ‘तर यस पटक देश बनाएको र बनाउने दल र नेताले जित्नै पर्ने भएकाले मतदानकै लागि आएको हुँ ।’ योग्य दल र उम्मेद्वारलाई निर्वाचित गराउन एक–एक मतको महत्व हुने भएकाले यस पटक देशका लागि आवश्यक उम्मेद्वार तथा दललाई मतदान गर्ने उहाँले जनाउनुभयो ।
उहाँहरु मात्रै होईन, अहिले धेरै नेपालीहरुका घर घरमा विदेशमा रहेका आफन्तहरु आउन थालेका छन् । केहि समय पछि आउने योजनामा रहेकाहरुले समेत चुनावमा मतदान हाल्न मिल्ने गरि समय मिलाउने प्रयासमा रहेको विदेशमा रहेका नेपालीहरुले बताएका छन् ।
झापा क्षेत्र नं. ५ मा नेकपा एमालेका अध्यक्ष एवम् पूर्वप्रधानमन्त्री केपी शर्मा ओली उम्मेद्वार रहनु भएको छ । उहाँ २०४८ सालको निर्वाचन देखिनै यहिँबाट निर्वाचित हुँदै आउनु भएको छ ।
