तेहरान,१७ फागुन । इरानले आइतबार बिहान मध्यपूर्वमा नयाँ चरणको हवाई आक्रमण सुरु गरेको छ । विभिन्न देशका राजधानी र प्रमुख सहरमा विस्फोटको आवाज सुनिएको सीएनएनका टोलीहरूले बताएका छन् । इरानको अर्धसरकारी समाचार एजेन्सी तास्मिन न्यूज एजेन्सीका अनुसार, इरानको इस्लामिक रिभोलुशनरी गार्ड कप्र्सले (आईआरजीसी)ले इजरायल र मध्य पूर्वक्षेत्रका अमेरिकी अड्डामा छैटौँ चरणको मिसाइल र ड्रोन आक्रमण सञ्चालन गरेको जनाइएको छ ।
इरानबाट प्रहार भएका मिसाइलहरू पहिचान गरेको र रक्षात्मक प्रणाली सञ्चालनमा रहेको इजरायली सेनाले बताएको छ । मध्य र दक्षिण इजरायलमा लगातार साइरन बजेका थिए । दुबईमा पनि बिहानभरि धेरै विस्फोटको आवाज सुनेको र आकाशमा धुवाँ देखेको बताइएको छ । दुबईको व्यावसायिक बन्दरगाह जेबेल अली पोर्टमा ड्रोन अवरोधका भग्नावशेषले आगो लागेको जनाइएको छ ।
कतारको दोहामा स्थानीय समय अनुसार बिहान ७ः३० बजे केही ठुलो विस्फोट सुनिएको थियो । कतारको गृह मन्त्रालयका अनुसार १६ जना घाइते भएका छन् र केही क्षेत्रहरूमा सामग्री क्षति सीमित भएको छ । बहराइनमा पनि मनामा स्थित क्राउन प्लाजा होटल नजिक धुवाँ उठेको भिडियोको सीएनएनले पुष्टि गरेको जनाइएको छ । बहराइनको गृह मन्त्रालयले साइरन बजाएको र बासिन्दालाई शान्त रहन र नजिकको सुरक्षित स्थानमा जान चेतावनी दिएको हो ।
इराकको एर्बिल विमानस्थलबाट कालो धुवाँ उठेको तस्बिरहरू बाहिरिएका थिए । इराकको फार्स न्यूज एजेन्सीका अनुसार आइतबार बिहान शहरमा भारी विस्फोट सुनिएको हो । यी घटनाले क्षेत्रीय तनाव अझ बढाएको र आगामी दिनमा सुरक्षा र राजनीतिक अवस्था जटिल बन्ने संकेत गरेको जनाइएको छ ।
