उदयपुर,२१ फागुन । उदयपुरको चौदण्डीगढी नगरपालिकामा आज बिहान मोटरसाइकल दुर्घटना हुँदा एक जनाको मृत्यु भएको छ भने दुई जना गम्भीर घाइते भएको प्रहरीले जनाएको छ।
मदन भण्डारी लोकमार्ग अन्तर्गत चौदण्डीगढी नगरपालिका वडा नं. १० भिमा खण्डमा गाईघाटबाट बेल्टारतर्फ जाँदै गरेको प्र.०१–०५–००२ प १८२७ नम्बरको मोटरसाइकल अनियन्त्रित भई दुर्घटना भएको छ।
तीव्र गतिमा रहेको मोटरसाइकल सडकको उत्तरतर्फ रहेको सखुवाको रुखमा ठोक्किँदा मोटरसाइकल चालक चौदण्डीगढी नगरपालिका–५ सिवाई बस्ने १८ वर्षीय समिर चौधरीको मृत्यु भएको प्रहरीले बताएको छ ।
दुर्घटनामा गम्भीर घाइते भएका चौधरीलाई तत्काल उद्धार गरी नगर अस्पताल बेल्टार लगिएकोमा अस्पताल पु¥याउनासाथ चिकित्सकले मृत घोषणा गरेको थियो ।
सोही दुर्घटनामा परी मोटरसाइकलमा सवार अन्य दुई जना गम्भीर घाइते भएको जनाइएको छ । घाइते हुनेहरूमा चौदण्डीगढी–५ सिवाई बस्ने १८ वर्षीय मौसम चौधरी र सोही ठाउँका २३ वर्षीय अशोक चौधरी रहेका हुन् ।
घाइते दुवै जनालाई नगर अस्पतालमा सामान्य उपचारपछि थप उपचारका लागि विराटनगर स्थित सुविधा सम्पन्न अस्पतालमा रेफर गरिएको जनाइएको छ ।
बिहान करिब ११ः०० बजे भएको उक्त दुर्घटनाको विषयमा इलाका प्रहरी कार्यालय बेल्टारबाट खटिएको प्रहरी टोलीले थप अनुसन्धान गरिरहेको बताएको छ । एउटै मोटरसाइकलमा तीन जना सवार रहेकाले अनियन्त्रित भई दुर्घटना भएको हुनसक्ने प्रारम्भिक अनुमान गरिएको जनाइएको छ ।
