दोलाखा,२१ फागुन।दोलखाको तामाकोशी गाउँपालिका वडा नम्बर ४ स्थित मालुको गोल्मेश्वर मावि मतदानस्थलबाट ५६ बुक मतपत्र गायब भएको जनाइएको छ।
प्रतिनिधिसभा सदस्य निर्वाचनको मतदान सुरु भएलगत्तै बिहीबार बिहान मतदानस्थलमा खटिएका कर्मचारीलाई हातपात गर्न खोज्दै एउटा समूहले उक्त मतपत्र लुटेको हो ।
नेकपा एमाले र राष्ट्रिय स्वतन्त्र पार्टीले भने उक्त काममा नेपाली कांग्रेस र नेपाली कम्युनिस्ट पार्टीका कार्यकर्ताको संलग्नता रहेको आरोप लगाएका हुन् ।
बिहानैदेखि जारी विवाद अझै पनि समाधान हुन सकेको छैन । सर्वदलीय बैठक बसेर मतदान सुरू गर्ने सहमति त भयो तर मतपत्र नै गायब भएपछि प्रक्रिया अघि बढेको छैन ।
हराएको मतपत्रको खोजी गरिए पनि मतपत्र नभेटिँदा मतदान अब अर्को दिनलाई सार्नुपर्ने अवस्था आएका जनाइएकोे छ।
बुथ कब्जा गर्न मतपत्रको बुक नै लिएर हिँडेका नेपाली कांग्रेसका वडा सदस्य यज्ञबहादुर श्रेष्ठ, तामाकोशी गाउँपालिका स्थित तरुण दलका अध्यक्ष अनिल श्रेष्ठ र नेकपाका नेता अर्जुन योगीविरुद्ध अब मुद्दा चल्ने भएको जनाइएको छ।
मतपत्र लुटपाटमा संलग्न यी तीनजनाको पहिचान भएको छ । अरू चार जना पनि नियन्त्रणमा रहेका छन् । उनीहरूलाई रिहा गर्ने तयारी प्रहरीको छ। मतपत्र लुटपाटको आरोप लागेका कांग्रेस र नेकपाले स्थानीय नेताहरूलाई तत्काल छाड्न भनेका छन्।
विवाद नमिलेपछि मतदानको अर्को मितिका लागि मतदान अधिकृतले अर्को मिति तोक्ने भएको छ।
