दमक, २५ फागुन | गौरादह नगरपालिकाका प्रमुख छत्रपति सुवेदीमाथि भएको आक्रमणको घटनाप्रति नेपाल मानव अधिकार संगठनले गम्भीर ध्यानाकर्षण भएको जनाएको छ।
संगठनले आज एक प्रेस विज्ञप्ति जारी गर्दै फागुन २४ गते साँझ गौरादह नगरपालिका–५ का भिष्म सिटौलाले मादक पदार्थ सेवन गरी नगर प्रमुख सुवेदीको घरमै पुगेर आक्रमण गरेको घटनालाई गम्भीर रूपमा लिएको जनाएको हो।
विज्ञप्तिमा नागरिकको स्वतन्त्र र सम्मानपूर्वक बाँच्न पाउने अधिकारमाथि आघात पुग्ने गरी भएको उक्त घटनाको वास्तविकता पत्ता लगाउन माग गरिएको छ। साथै, उक्त घटना एकल व्यक्तिको कार्य हो वा कसैको उक्साहटमा भएको हो भन्ने विषयमा निष्पक्ष अनुसन्धान गरी दोषीमाथि कानुनअनुसार कारबाही गर्न सम्बन्धित निकायलाई आग्रह गरिएको छ।
नेपाल मानव अधिकार संगठनका कोशी प्रदेश संयोजक जयबहादुर श्रेष्ठ र केन्द्रीय उपाध्यक्ष कमल प्रसाद सुवेदीद्वारा जारी विज्ञप्तिमा सम्पूर्ण नागरिकको मानवअधिकारको संरक्षण र सुरक्षा सुनिश्चित गर्न पनि सरकारको ध्यानाकर्षण गराइएको छ।
उक्त घटनामा संलग्न आरोपमा गौरादह नगरपालिका–५ का ३४ वर्षीय भिष्म सिटौलालाई प्रहरीले नियन्त्रणमा लिएर अनुसन्धान अघि बढाइरहेको छ। पक्राउ परेका सिटौलालाई अनुसन्धान गर्न १० दिनको म्याद थप गरेको छ ।
