दमक, २ चैत्र । सामाजिक सञ्जालमा ‘ अव बन्न लागेको रास्वपा तथा बालेन्द्र शाह नेतृत्वको सरकारका कारण पेट्रोलको मूल्य बढाइयो’ भन्ने टिप्पणी फैलिरहेको छ । तर नेपाल आयल निगमले भने मूल्यवृद्धि राजनीतिक कारणले नभई अन्तर्राष्ट्रिय बजारको असरका कारण भएको स्पष्ट पारेको छ।
निगमले जारी गरेको प्रष्टीकरणमा अमेरिका–इजरायल–इरानबीच बढ्दो तनावका कारण अन्तर्राष्ट्रिय बजारमा पेट्रोलियम पदार्थको मूल्य बढेकाले नेपालमा पनि मूल्य समायोजन गर्नुपरेको उल्लेख छ।
निगमका अनुसार अन्तर्राष्ट्रिय बजारको वास्तविक मूल्यअनुसार समायोजन गर्ने हो भने पेट्रोल प्रतिलिटर ३१ रुपैयाँ र डिजेल प्रतिलिटर ५४ रुपैयाँसम्म बढाउनुपर्ने अवस्था थियो। तर उपभोक्तालाई भार नपरोस् भनेर कम मात्र वृद्धि गरिएको निगमको भनाइ छ।
निगमका अनुसार पेट्रोल प्रतिलिटर १५ रुपैयाँले बढेको छ भने डिजेल र मट्टीतेल प्रतिलिटर १० रुपैयाँले महँगिएको छ। खाना पकाउने ग्यासको मूल्य भने यथावत राखिएको छ। यस्तै अन्तर्राष्ट्रिय बजारबाट खाना पकाउने ग्यास प्रतिसिलिन्डर २१६ रुपैयाँ बढेर आए पनि नेपालमा त्यसको मूल्य भने नबढाइएको निगमले जनाएको छ।
