दमक, ६ चैत्र । झापाको कमल गाउँपालिकामा सवारी चलाउँदै गरेका एक चालकको अचानक मृत्यु भएको छ ।
बिहिवार साँझ करिब ६ बजेर ३० मिनेट जाँदा कमल गाउँपालिका–५ सितापुरी चोकस्थित पूर्व–पश्चिम राजमार्गमा उक्त घटना भएको हो ।
बिर्तामोडबाट पथरीतर्फ जाँदै गरेको प्रदेश १–०४–००१ च ००८० नम्बरको स्कारपियो गाडीका चालक मोरङको शनिश्चरे नगरपालिका–९ निवासी ४५ वर्षीय योगेश धिमाल गाडी चलाउने क्रममा अचानक असहज भएका थिए ।
प्रहरीका अनुसार चालक धिमालले गाडी सडक किनारामा रोकेरै बेहोस भएका थिए ।
गाडीमा सवार यात्रुहरूले उनलाई बोलाउँदा कुनै प्रतिक्रिया नदिएपछि स्थानीयको सहयोगमा तत्काल उपचारका लागि दमकस्थित निम्स अस्पताल पुर्याइएको थियो ।
तर, अस्पतालमा उपचारकै क्रममा साँझ करिब ८ बजे चिकित्सकले उनलाई मृत घोषणा गरेका छन् ।
घटनापछि इलाका प्रहरी कार्यालय दमकबाट खटिएको टोलीले आवश्यक अनुसन्धान तथा कानुनी प्रक्रिया अगाडि बढाएको छ ।
मृतक धिमालको शव पोस्टमार्टमका लागि मदन भण्डारी अस्पताल तथा ट्रमा सेन्टर, मंगलबारे उर्लाबारी पठाइएको प्रहरीले जनाएको छ ।
प्रहरीले घटनाको थप अनुसन्धान जारी राखेको छ ।
