दमक| ८ चैत | स्थानीय सरकारको जिम्मेवारी सम्हाल्ने जनप्रतिनिधिले नै पदको मर्यादा भुलेर वडा कार्यालयभित्रै अभद्र व्यवहार गरेपछि गौरीगञ्ज गाउँपालिकामा तनावको अवस्था सिर्जना भएको छ।
गौरीगञ्ज गाउँपालिका–६ स्थित वडा कार्यालयमा वडा सदस्यले मदिरा सेवनको अवस्थामा वडा अध्यक्ष र कर्मचारीहरूलाई गालीगलौज, धाकधम्की र अपमानजनक व्यवहार गरेपछि प्रहरीको नियन्त्रणमा पुगेका छन्।
डौवाबारी बस्ने करिब ३२ वर्षीय नितेश कुमार साहले सोही दिन बिहान करिब ११ बजे वडा कार्यालयमै वडा अध्यक्ष बद्री नारायण यादव सहित उपस्थित कर्मचारीहरूलाई अपशब्द प्रयोग गर्दै अभद्र व्यवहार गरेको आरोप छ।
घटना पछि पीडित पक्षले शनिबार साँझ इलाका प्रहरी कार्यालय गौरीगञ्जमा लिखित उजुरी दिएका थिए।
उजुरीका आधारमा सोही दिन साँझ ६ बजे प्रहरी टोली खटिएर वडा सदस्य साहलाई नियन्त्रणमा लिएको जिल्ला प्रहरी कार्यालयले जनाएको छ।
उनीमाथि मुलुकी अपराध संहिता २०७४ अन्तर्गत अभद्र व्यवहार सम्बन्धी कसुरमा अनुसन्धान अघि बढाइएको छ। जिल्ला प्रशासन कार्यालय झापाबाट ५ दिनको म्याद लिएर थप अनुसन्धान भइरहेको प्रहरीले जनाएको छ।
