विराटनगर,१२ चैत।विराटनगरमा एक साताअघि भएको जघन्य हत्याकाण्डको रहस्य खुलेको छ। आफ्नै श्रीमतीको हत्या गरी शव लुकाउन खोज्ने एक व्यक्ति पक्राउ परेका छन्। जिल्ला प्रहरी कार्यालय मोरङले बुधबार पत्रकार सम्मेलन गर्दै विराटनगर महानगरपालिका–१५ हर्ताली हाटकी ३२ वर्षीया कोमल कुमारी साहको हत्या प्रकरणमा उनका श्रीमान् ३२ वर्षीय रोशन साह मुख्य योजनाकार रहेको र शव व्यवस्थापनमा सहयोग गर्ने मतियारका रूपमा उनका दाजु ४६ वर्षीय दिपेन्द्र साह संलग्न रहेको बताएको छ। प्रहरीले दुवैलाई नियन्त्रणमा लिएको छ।
प्रहरीका अनुसार गत चैत ६ गते मध्यरातमा रोशनले घरभित्रै श्रीमतीको सारी र गलबन्दी प्रयोग गरी घाँटी कसी हत्या गरेका थिए। घटनापछि शव लुकाउन उनले आफ्ना दाजुसँग मिलेर योजना बनाएका थिए। कोमलको हातखुट्टा बाँधेर तन्नामा पोको पारिएको शव सिटी सफारीमा राखी घरबाट करिब चार किलोमिटर टाढा विराटनगर–१७ स्थित छाला फ्याक्ट्री नजिकैको कल्भर्टमुनि पानी जमेको नालीमा फालिएको थियो।
घटनालाई ढाकछोप गर्न रोशनले शव फालेको दुई दिनपछि इलाका प्रहरी कार्यालय रानी पुगेर श्रीमती हराएको भन्दै निवेदन दिएका थिए। उनले आफूमाथि शंका नहोस् भनेर माइती पक्षसँग सम्पर्क राख्दै खोजीको नाटकसमेत गरेका थिए।
तर चैत १० गते स्थानीयले कल्भर्टमुनि शङ्कास्पद पोको देखेपछि प्रहरीलाई खबर गरे। घटनास्थलमा पुगेको प्रहरी टोलीले तन्ना खोलेर हेर्दा सडेको अवस्थामा महिलाको शव फेला पारेको थियो।
मोरङ प्रहरीका प्रवक्ता डीएसपी लिलाराज लामिछानेका अनुसार घटनास्थल, शवको अवस्था र हराएको निवेदनको विश्लेषणपछि अनुसन्धानको घेरा मृतककै श्रीमानतर्फ केन्द्रित भएको थियो। सघन सोधपुछका क्रममा रोशनले हत्या स्वीकार गरेको प्रहरीले बताएको छ।
प्रहरीले घटना स्थलमा सीसीटीभी नभएको सडक प्रयोग गरिएको र दुर्गन्धित फोहर फाल्ने स्थान रोजिएको आधारमा हत्या पूर्वनियोजित रहेको निष्कर्ष निकालेको छ। मृतकको पहिचान माइती पक्षले हातको चुरा, औँठी र हरियो सारीका आधारमा गरेका थिए।
प्रारम्भिक अनुसन्धानमा दाम्पत्य सम्बन्धमा उत्पन्न अविश्वास र पारिवारिक शङ्का हत्याको मुख्य कारण देखिएको प्रहरीले बताएको छ। दुवै अभियुक्तलाई मोरङ जिल्ला अदालतबाट पाँच दिनको म्याद थप गरी कर्तव्य ज्यान मुद्दामा थप अनुसन्धान भइरहेको छ। प्रहरीले घटनामा प्रयोग भएको सवारीसाधन सहित अन्य प्रमाण पनि सङ्कलन गरिसकेको छ।
