काठमान्डौं,१२ चैत । प्रतिनिधि सभाका ज्येष्ठ सदस्य अर्जुननरसिंह केसी ले आज नवनिर्वाचित २७४ जना सांसदलाई पद तथा गोपनीयताको शपथ गराउने हुनु भएको छ।
केसीले यसअघि बुधबार राष्ट्रपति रामचन्द्र पौडेल बाट ज्येष्ठ सदस्यको हैसियतमा शपथ ग्रहण गर्नु भएकोका थियो। अब सोही हैसियतमा उहाँले नयाँ सांसदलाई शपथ गराउन लाग्नु भएको हो ।
सङ्घीय संसद् सचिवालयका प्रवक्ता एकराम गिरीका अनुसार शपथ कार्यक्रमका लागि सम्पूर्ण प्राविधिक तथा व्यवस्थापकीय तयारी पूरा भइसकेको छ। कार्यक्रम बिहीबार दिउँसो २ बजे सिंहदरबारस्थित निर्माणाधीन सङ्घीय संसद् भवनको बहुउद्देश्यीय सभाकक्षमा हुने तय भएको छ। आवश्यक विवरण सङ्कलन गर्नुपर्ने भएकाले सांसदहरूलाई शपथभन्दा कम्तीमा दुई घण्टा अघि उपस्थित हुन आग्रह गरिएको छ।
प्रतिनिधि सभा सदस्य निर्वाचन ऐन, २०७४ को दफा ७५ अनुसार कुनै पनि सदस्यले सभामा वा समितिमा भाग लिनुअघि अध्यक्षता गर्ने व्यक्तिसमक्ष शपथ लिन अनिवार्य छ। सोही व्यवस्था अनुसार केसीले शपथ गराउनु हुनेछ ।
शपथका लागि नवनिर्वाचित सदस्यले निर्वाचित प्रमाणपत्रको प्रतिलिपि, दुई प्रति फोटो र नागरिकता प्रमाणपत्रको प्रतिलिपि बुझाउनुपर्नेछ। साथै सचिवालयले उपलब्ध गराएको आवेदन फाराम भरी बैंक खाता र सम्पर्क विवरण पनि बुझाउन आग्रह गरिएको छ।
यदि कोही सदस्य शपथ लिन छुटेमा, उनीहरूको अनुकूल समयमा ज्येष्ठ सदस्यमार्फत पुनः शपथ गराउने व्यवस्था मिलाइएको छ।
यसैबीच, ५४ जना नवनिर्वाचित सदस्यले मातृभाषामा शपथ लिने जानकारी दिएका छन्। प्रवक्ता गिरीका अनुसार यो संख्या अझै बढ्न सक्ने सम्भावना छ। नेपाली बाहेक मैथिली, भोजपुरी, नेपाल भाषा, बज्जिका, रानाथारू, थारूलगायत भाषामा शपथ लिने तयारी गरिएको छ।
नवयुवा पुस्ताको सक्रिय सहभागितामा सम्पन्न निर्वाचनबाट निर्वाचित सांसदहरूको शपथसँगै नयाँ कार्यकाल औपचारिक रूपमा सुरु हुनेछ।
