काठमाडौं, १४ चैत । नेकपा (एमाले)का नेता एवं पूर्वमन्त्री लालबाबु पण्डितले सरकारको पछिल्लो कदमलाई प्रतिशोधपूर्ण भएको आरोप लगाउनु भएको छ ।
शनिबार च्यासलस्थित नेपाल कम्युनिष्ट पार्टी (एमाले)को केन्द्रीय कार्यालय परिसरमा सञ्चारकर्मीसँग कुरा गर्दै उहाँले सरकारको पहिलो निर्णयमै पूर्वप्रधानमन्त्री र पूर्वगृहमन्त्रीलाई पक्राउ गर्नु राजनीतिक प्रतिशोधको सुरुआत भएको दाबी गर्नु भएको हो
उहाँले भन्नु भयो , ‘सरकारको पहिलो निर्णय नै प्रतिशोधपूर्ण र देशका पूर्वप्रधानमन्त्री, पूर्वगृहमन्त्रीलाई नै पहिलो पक्रेर राजनीतिक प्रतिशोधको सुरुआत गरिएको छ । प्रतिशोधबाट सुशासन प्राप्त हुन सक्दैन । त्यसकारणले गर्दाखेरि प्रतिशोधको जवाफ प्रतिवाद हुन्छ र हामी सुशासनकै पक्षमा छौँ, कानुनी उपचारको पक्षमा जान्छौँ । राजनीतिक पार्टी र राजनीतिक पार्टीको नेता नेकपा (एमाले)को अध्यक्ष र नेपाली कांग्रेसको पूर्वगृहमन्त्री समेत एकैचोटि पक्राउ जुन गरिएको छ, यो प्रतिशोधको राजनीतिको सुरुआत गरिएको हुनाले गर्दा यसको प्रतिवाद नेकपा (एमाले)ले गर्छ । नेपाली कांग्रेसले के गर्छ, अरू थाहा छैन ।’
उहाँले प्रतिशोधबाट सुशासन प्राप्त हुन नसक्ने उल्लेख गर्दै एमाले सँधै सुशासन र कानुनी उपचारको पक्षमा रहने बताउनु भएको हो । साथै, उहाँले यस्तो कदमले राजनीतिक स्थायित्वभन्दा द्वन्द्व निम्त्याउने चेतावनी समेत दिनुभयो ।
पण्डितले एमाले अध्यक्ष तथा नेपाली कांग्रेसका पूर्वगृहमन्त्रीलाई एकैपटक पक्राउ गरिएको घटनालाई राजनीतिक प्रतिशोधको उदाहरणका रूपमा व्याख्या गर्दै यसको प्रतिवाद गर्ने स्पष्ट पार्नुभयो । उहाँले नेपाली कांग्रेसले के गर्ने भन्ने विषय उक्त पार्टीकै निर्णयमा निर्भर रहने पनि बताउनु भयो ।
यदि सरकारले संविधान र कानुनी मान्यताको पालना नगरी अराजक गतिविधिलाई प्रोत्साहन गरे राजनीतिक दलहरू प्रतिवाद गर्न बाध्य हुने बताउनु भयो । उहाँले वर्तमान कदमलाई ‘दुर्भाग्यपूर्ण’ भन्दै यसले देशमा अशान्ति निम्त्याउन सक्ने आशंका व्यक्त गर्नु भयो ।
उहाँले एमालेले राजनीतिक तथा कानुनी दुवै प्रकारको लडाइँ लड्ने बताउँदै अहिले पार्टी बैठक जारी रहेकाले थप निर्णय बैठकपछि सार्वजनिक गरिने जानकारी दिनु भएको छ ।
पण्डितले सुरक्षाकर्मीको भूमिकाप्रति पनि प्रश्न उठाउँदै यदि प्रहरीद्वारा गोली चलाउने अवस्था आयो भने भविष्यमा प्रधानमन्त्री र गृहमन्त्रीसमेत कानुनी जोखिममा पर्न सक्ने चेतावनी दिनुभयो ।
उहाँले भन्नु भयो , ‘प्रधानमन्त्री भइसकेपछि कुनै ठाउँमा कतै पनि प्रहरीले गोली चलाउँछ कि चलाउँदैन ? यदि, कुनै ठाउँमा गोली चल्यो भने प्रधानमन्त्री नै फेरि जेल जानुपर्ने, गृहमन्त्री नै फेरि जेल जानुपर्ने स्थिति भयो भने देशको कुनै पनि गृहमन्त्री, प्रधानमन्त्री सुरक्षित रहने छैन ।’
