काठमाडौँ,१८ चैत । नेकपा एमालेको संसदीय दलको नेतामा रामबहादुर थापा बादल र सुहाङ नेम्वाङले दाबी गर्नु भएको छ। ललितपुरस्थित केन्द्रीय कार्यालय च्यासलमा बसेको दलको बैठकमा बादललाई सर्वसम्मत रूपमा दलको नेता चयनका लागि छलफल भइरहेको एक सांसदले जानकारी दिनु भएको छ । सहमति नभएको निर्वाचन प्रक्रियाबाट टुङ्गो लगाउने ती सांसदले बताउनु भयो ।
‘दलको नेतामा रामबहादुर थापालाई प्रस्ताव गरिएको हो । तर सुहाङजीले जेनजी आन्दोलनको भावना, संसदमा युवाहरूको बाहुल्यता रहेको अवस्थामा आफूलाई दलको नेता बनाएमा राम्रो सन्देश जाने बताउनुभएको छ । सकेसम्म सर्वसम्मत रूपमा दलको नेता चयन हुने छ । सहमति नभए निर्वाचन प्रक्रियाबाट टुंग्याइन्छ’, एक सांसदले भन्नु भयो।
ती सांसदका अनुसार अहिले सर्वसम्मत रूपमा नेता चयन गर्न छलफलमै रहनु भएको छ । फागुन २१ मा भएको निर्वाचनमा एमालेले २५ सिट जित हासील गरकोे थियो ।
