काठमाडौं,२१ चैत ।राष्ट्रिय प्रजातन्त्र पार्टी (राप्रपा) का संसदीय दलका नेता ज्ञानबहादुर (ज्ञानेन्द्र) शाहीले सत्तारुढ दल राष्ट्रिय स्वतन्त्र पार्टी (रास्वपा) का सभापति रवि लामिछानेसँग भेटवार्ता गर्नु भएको छ।
नेता शाही शनिबार बिहान सभापति लामिछानेलाई भेट्न उहाँकै निजी निवास बुढानीलकण्ठ पुग्नु भएको थियो। समसामयिक राजनीतिक परिस्थिति र आगामी दिनमा हुनसक्ने सहकार्यका विषयमा उहाँहरूबीच छलफल भएको बताइएको छ।
भेटवार्तापछि सामाजिक सञ्जालमा लामिछानेसँगको तस्बिर सार्वजनिक गर्दै नेता शाहीले विगतका भोगाइले आफूहरूलाई थप परिपक्व र दृढ बनाएको प्रतिक्रिया दिनु भएको छ।
उहाँले लेख्नु भएको छ, ‘विगतका दुःखहरूले हामीलाई कमजोर होइन, दृढ बनाएको छ। त्यसैले आज हामी एकजुट भएर देश बनाउने महाअभियानमा अघि बढिरहेका छौँ।’
पछिल्लो समय सभापति लामिछानेको बुढानीलकण्ठस्थित निवासमा विभिन्न राजनीतिक दलका नेताहरूको आवतजावत बाक्लिएको छ।
गत मंगलबार लोकतान्त्रिक समाजवादी पार्टी (लोसपा) का अध्यक्ष महन्थ ठाकुर र आम जनता पार्टी (आजपा) का अध्यक्ष तथा पूर्वमन्त्री प्रभु साहले पनि लामिछानेलाई उहाँकै निवासमा पुगेर भेटवार्ता गर्नु भएको थियो।
