दमक , २१ चैत । आज बिहान करिब ८ बजेर ३० मिनेटको समयमा बिर्तामोड नगरपालिका–५ स्थित एक डेरा कोठामा खेल्ने क्रममा ५ वर्षीया मानस्वी आचार्य झ्यालबाट लडेर गम्भीर घाइते भएकी थिइन्। उनी दमक नगरपालिका–४ बस्ने मनोज आचार्यकी छोरी हुन्। मानस्वी पाहुना भएर ताप्लेजुङ फुङलिङ नगरपालिका–३ घर भई हाल मन्जु उप्रेतीको घरमा डेरा गरी बस्दै आएका हेमसागर भट्टराईको कोठामा पुगेकी थिइन्।
घाइते बालिकालाई तत्काल उपचारका लागि बिर्तामोडस्थित बी एण्ड सी अस्पताल लगिएको थियो। तर उपचारकै क्रममा बिहान १० बजेर ५५ मिनेटमा चिकित्सकले मृत घोषणा गरेका छन्।
घटनापछि शव सोही अस्पतालमा राखिएको छ भने आवश्यक अनुसन्धान तथा कानुनी प्रक्रिया अघि बढाउन इलाका प्रहरी कार्यालय अनारमनीबाट प्रहरी टोली खटिएको प्रहरीले जनाएको छ।
