दुबई,२१ चैत। दुबईमा इरानको ड्रोन आक्रमणमा परेर घाइते भएका ७ जना नेपाली खतरामुक्त रहेको बताइएको छ । उनीहरू खतरामुक्त रहेको परराष्ट्र मन्त्रालयले बताएको छ। घाइतेमध्ये ६ जना उपचार गराएर काममा फर्किसकेका छन् भने अर्का एक जनाको उपचार चलिरहेको मन्त्रालयले बताएको छ । उपचाररत घाइते पनि खतरामुक्त रहेको परराष्ट्र मन्त्रालयका प्रवक्ता एवं सहसचिव लोकबहादुर क्षेत्रीले बताउनु भयो ।
उहाँले पश्चिम एसियाली देशहरूमा चर्केको द्वन्द्व कारण बिदाका दिन पनि परराष्ट्रका अधिकारीहरू घटनाको जानकारी सङ्कलनमा जुटिरहेको जनाइएबो छ । दुबईस्थित नेपाली दूतावासले पनि सबै घाइते खतरामुक्त रहेको बताएको छ । दूतावासले घाइते नेपालीहरुसँग फोन सम्पर्क भइरहेको बताएको छ । अस्पतालबाट डिस्चार्ज भएकाहरूमध्ये चार जनालाई आजै दूतावासका अधिकारीहरू भेटघाट समेत गरेका छन् ।
‘उनीहरू चारै जनाको अवस्था ठिक छ, आवश्यक सहयोगका लागि समन्वय भइरहेको छ’ प्रवक्ता क्षेत्रीले भन्नु भयो, ‘अन्य बाँकी ३ जनासँग पनि कर्मचारीले चाँडै प्रत्यक्ष भेटेर जानकारी लिने तयारी भइरहेको छ ।’ उहाँले अस्पतालमा उपचारत रहेका नेपालीसँग पनि फोन सम्पर्क भएको बताउनु भयो । उपचाररत नेपाली पनि स्वस्थ्य हुँदै गएका र केही दिनमा डिस्चार्ज हुने मन्त्रालयले बताएको छ ।
दुबई लगायत अन्य मुलुकमा पनि परराष्ट्र मन्त्रालयले नियमित जानकारी लिइरहेको प्रवक्ता क्षेत्रीले बताउनु भयो । अप्ठ्यारो परेकालाई सम्बन्धित निकायहरूबाट समयमै सहयोग भइरहेको उहाँले बताउनु भयो । क्षेत्रीले कसैलाई कुनै प्रकारको समस्या भएमा परराष्ट्र मन्त्रालय वा सम्बन्धित दूतावासमा सम्पर्क गर्न सार्वजनिक अपिल गरिएको पनि जानकारी दिनु भयो ।
