काठमाडौं,१३ वैशाख । सूचना तथा प्रसारण विभागका महानिर्देशक छविन्द्र पराजुलीले नेपाललाई विश्वसामु चिनाउन फोटो पत्रकारिताको महत्वपूर्ण भूमिका रहेको बताउनु भएको छ ।पर्यटन प्रवद्र्धनमा फोटो पत्रकारको भूमिका विषयक अन्तरक्रिया तथा पुरस्कार घोषणा एवं भित्तेपात्रो विमोचन कार्यक्रममा बोल्दै उहाँले नेपालको प्राकृतिक सुन्दरतालाई अन्तर्राष्ट्रिय स्तरमा चिनाउन फोटो पत्रकारहरूले ठूलो योगदान पुर्याउने उल्लेख गर्नु भएको छ।
उहाँले भन्नु भयो, ‘नेपाललाई चिनाउने भनेकै हाम्रो सुन्दर प्राकृतिक फोटोहरू हुन् । सिर्जनात्मक फोटोलाई संरक्षण र प्रवद्र्धन गर्न सके देशलाई आर्थिक रूपमा समेत समृद्ध बनाउन सकिन्छ ।’
पराजुलीले इतिहास लेखनमा पनि फोटो पत्रकारिताको महत्वपूर्ण भूमिका रहने बताउनु भयो । ‘हामीले लेख्ने इतिहास पनि फोटोको आधारमा तयार हुन्छ । आगामी पुस्तालाई विगतको नेपाल कस्तो थियो भन्ने जानकारी दिन फोटोहरूले महत्वपूर्ण योगदान पुर्याउँछन्,’ उहाँले भन्नु भयो।
उहाँले फोटो पत्रकारलाई ‘फोटो बैंक’ को संज्ञा दिँदै यस क्षेत्रलाई व्यवस्थित रूपमा विकास गर्न आवश्यक रहेको धारणा राख्नु भयो । ‘जसरी बैंकमा पैसा राखेर संस्था धनी बन्छ, त्यसैगरी फोटो पत्रकारसँग भएका तस्वीरहरू अझ मूल्यवान् हुन्छन् । राष्ट्रिय फोटो पत्रकार समूहलाई फोटो बैंकको रूपमा विकास गर्नुपर्छ,’ उहाँले भन्नु भयो।
उहाँले देशभर रहेका फोटो सङ्ग्रहालयहरूलाई व्यवस्थित गरी बैंकको रूपमा सञ्चालन गर्न सकिने सुझाव दिनु भयो । त्यहाँबाट निश्चित शुल्क लिएर फोटो प्रयोग गर्ने व्यवस्था मिलाउन सके संस्थाहरू आर्थिक रूपमा सबल बन्न सक्ने बताउनु भयो । उहाँले भन्नु भयो, ‘हामीसँग भएका सबै फोटो सङ्ग्रहालयहरूलाईं बैंकको रुपमा राख्नुपर्छ । त्यहाँबाट फोटोहरु निश्चित शुल्क तिरेर प्रयोग गर्यौं भने संस्था पनि धनि हुन्छ ।’
