रोल्पा ,१९ वैशाख । रुकुम पूर्वबाट रोल्पाको थवाङतर्फ जाँदै गरेको लु १ ज ४१६७ नम्बरको जीप दुर्घटना भएको आज तीन दिन बितेको छ। ७०० मिटर गहिरो भीरमा खसेको त्यो जीपसँगै २० जना नेपालीको सपना र भविष्य सधैँका लागि अस्ताएको छ। तर, यो भयानक मानवीय क्षतिमा राज्यका कतिपय नेतृत्वको मौनताले यतिबेला मृतकका आफन्त र नागरिकलाई झनै मर्माहत बनाएको छ।
घटनाको तीन दिनपछि मात्रै सत्तारुढ राष्ट्रिय स्वतन्त्र पार्टीले औपचारिक शोक वक्तव्य निकालेको छ। प्रवक्ता मनिष झाले आज शनिबार विज्ञप्ति जारी गर्दै सडक सुरक्षा र नीतिगत सुधारको कुरा त गर्नुभयो, तर प्रश्न उठेको छ— के २० जना नागरिकको ज्यान जाँदा शोक व्यक्त गर्न पनि तीन दिन कुर्नुपर्ने हो?
अझ अचम्मको कुरा त के छ भने, देशका प्रधानमन्त्री बालेन शाह र रास्वपा सभापति रवि लामिछानेले यति ठूलो दुर्घटनाबारे अहिलेसम्म दुई शब्द पनि खर्चिनु भएको छैन्। सरकारका प्रवक्ता सस्मित पोखरेलको मौनता पनि उस्तै छ।
यद्यपि, शल्यक्रियापछि स्वास्थ्य लाभ गरिरहनु भएका एमाले अध्यक्ष केपी शर्मा ओली र पुष्पकमल दाहाल प्रचण्डले भने घटनालगत्तै शोक व्यक्त गर्दै परिवारजनमा समवेदना प्रकट गर्नुभएको थियो।
दुर्घटनापछिको उद्धारको कथा झनै दर्दनाक छ। भीरमा अड्किएका शव निकाल्न सुरक्षाकर्मी र स्थानीयले ज्यान जोखिममा राखेर काम गरे। स्थानीय जनप्रतिनिधिले उद्धारका लागि हेलिकोप्टरको गुहार मागे पनि संघीय सरकारबाट कुनै सहयोग प्राप्त हुन सकेन। बालेनको सचिवालयमा गरिएको फोन पटक–पटक काटिएको आरोपले दुर्गमका नागरिकप्रति राज्य कति निर्दयी छ भन्ने प्रष्ट देखाएको छ।
सडकको अवस्था र राज्यको बेवास्ताले कतिञ्जेल नेपालीले यसरी नै भीरबाट खसेर ज्यान गुमाइरहनुपर्ने? के दुर्गमका नागरिकको जीवनको मूल्य केन्द्रमा बस्नेहरूका लागि केही पनि होइन? यी प्रश्नहरूले यतिबेला उत्तर खोजिरहेका छन्।
मृतकहरूप्रति भावपूर्ण श्रद्धाञ्जली र शोक सन्तप्त परिवारमा धैर्य धारण गर्ने शक्ति मिलोस्।
