काठमाडौं,१९ वैशाख । काठमाडौंको विष्णुमती नदी किनारमा अनधिकृत संरचना हटाउन पुगेको महानगरको डोजर आज विहान रोकिएको छ। नयाँ बसपार्क नजिकैको क्षेत्रमा डोजरले काम सुरु गर्न खोज्दा स्थानीयले ’लालपुर्जा’ देखाउँदै अवरोध गरेपछि स्थिति फेरिएको हो। करीब १०–१२ घरधुरीले आफूसँग वैधानिक लालपुर्जा रहेको र आफ्नो निजी सम्पत्तिमा डोजर चलाउन नपाइने भन्दै कडा अडान लिएका छन्। स्थानीयको यो प्रतिवादपछि काठमाडौंका प्रमुख जिल्ला अधिकारी ईश्वर राज पौडेलले तत्काल जग्गाको सत्यतथ्य छानबिन गर्न ८ सदस्यीय उच्चस्तरीय सरकारी टोली परिचालन गर्नुभएको छ।
“केही जग्गाधनीहरूले पूर्जा भएको दाबी गरेपछि त्यसलाई यकिन गर्न महानगर, नापी, मालपोत, जिल्ला प्रशासन र बागमती सभ्यता एकीकृत विकास समितिका अधिकृतहरू सम्मिलित टोली फिल्डमा खटिएको छ। टोलीको रिपोर्ट आएपछि मात्रै डोजर अघि बढ्ने वा नबढ्ने टुंगो लाग्नेछ।“ नदी किनारका सार्वजनिक जग्गा संरक्षण गर्ने अभियानमा यो घटनाले नयाँ मोड ल्याएको छ। के साँच्चै नदी किनारमा निजी लालपुर्जा सम्भव छ? वा यो राज्यको आँखा छल्ने अर्को प्रयास हो? सरकारी टोलीको ’भेरिफिकेसन’ पछि मात्र यसको रहस्य खुल्नेछ।
