हेटौंडा,२१ वैशाख । बागमती प्रदेशका मुख्यमन्त्री इन्द्रबहादुर बानियाँ माथि सम्पत्ति शुद्धीकरण विभागले कडा निगरानी सुरु गरेको छ। सोमबार दिउँसो काठमाडौंबाट आएको विभागको विशेष टोलीले मुख्यमन्त्री बानियाँको निवास र उहाँको निजी निर्माण कम्पनीमा एकैसाथ छापा मारेपछि राजनीतिक र प्रशासनिक वृत्तमा ठूलो हलचल मच्चिएको छ।
हेटौंडास्थित मुख्यमन्त्रीको निवासमा दिउँसो करिब १२ बजे पुगेको ७ सदस्यीय टोलीले झण्डै २ घण्टासम्म गहन खानतलासी गरेको थियो। टोली दिउँसो २ बजे मात्र त्यहाँबाट बाहिरिएको थियो। निवास मात्र होइन, हेटौंडा–५, पिप्लेमा रहेको बानियाँको आफ्नै स्वामित्वको ’बानियाँ निर्माण सेवा’ मा पनि विभागले छापा मारेको छ। अनुसन्धानमा संलग्न अधिकारीहरूका अनुसार घर र कार्यालय दुवै ठाउँबाट अनुसन्धानका लागि महत्वपूर्ण मानिएका थुप्रै कागजातहरू टोलीले नियन्त्रणमा लिएको छ। यद्यपि, ती कागजातहरू के–सँग सम्बन्धित छन् भन्ने कुरा गोप्य राखिएको छ।
रोचक कुरा के छ भने, जुन बेला विभागको टोलीले उहाँको घर खनतलास गरिरहेको थियो, मुख्यमन्त्री बानियाँ भने संसदीय दलको बैठकमा व्यस्त हुनुहुन्थ्यो। सभामुख चयन र मन्त्रिपरिषद् फेरबदल जस्ता गम्भीर राजनीतिक विषयमा छलफल भइरहँदा उहाँले आफ्नो घरमा छापा मारिएको खबर पाउनु भएको थियो। “सम्पत्ति शुद्धीकरण सम्बन्धी परेको उजुरीका आधारमा यो अनुसन्धान र छापा मारिएको हो।“ — अनुसन्धान अधिकारीले बताँउनु भयो ।
आफ्नै घर र व्यवसाय माथि विभागले छापा मारेपछि यतिबेला सबैको नजर मुख्यमन्त्री बानियाँतिर सोझिएको छ।
के मुख्यमन्त्रीको सम्पत्ति विवरणमा केही कैफियत भेटिएला? वा यो केवल नियमित प्रक्रिया मात्र हो? विभागको आगामी कदमले नै यो कुराको फैसला गर्नेछ।
