दमक ,२२ बैशाख | कर्मचारीले विधि खोजून्, नेताको छहारी होइन — र विद्यार्थीले राजनीति सिक्दा गुरुबाट सिकून्, नेताको भीडबाट होइन। यही सन्देशसहित प्रधानमन्त्री बालेन शाह ले शिक्षालय र कर्मचारीतन्त्रलाई दलगत प्रभावबाट मुक्त गर्ने सरकारको निर्णय सार्वजनिक गर्नुभएको छ।
प्रधानमन्त्री शाहले वर्षौंदेखि विद्यार्थी संगठन र कर्मचारीतन्त्र दलगत प्रभावको “स्लिपर सेल” जस्तै बनेको भन्दै यसले प्रणालीप्रतिको जनविश्वास कमजोर बनाएको बताउनुभयो। उहाँका अनुसार योग्यता र क्षमताभन्दा पहुँच र झण्डाको मूल्य बढ्दै जाँदा शिक्षा र प्रशासन दुबै क्षेत्र प्रभावित भएका छन्।
सरकारले अब शिक्षालयमा दलको झण्डा र कर्मचारीतन्त्रमा दलको झोला निषेध गर्ने स्पष्ट निर्णय लिएको जनाएको छ। प्रधानमन्त्री शाहले यस निर्णयले अधिकार नखोस्ने, बरु पेशागत स्वतन्त्रता बलियो बनाउने दाबी गर्नुभयो। अब नियुक्ति, सरुवा र बढुवाको आधार दलगत निकटता होइन, विधि, क्षमता र दक्षता बन्नुपर्ने उहाँको भनाइ छ।
प्रधानमन्त्री शाहले विद्यार्थीले राजनीति सिक्नैपर्ने तर त्यो सभ्यता, विचार र जिम्मेवारीको राजनीति हुनुपर्नेमा जोड दिनुभयो। कर्मचारीले पनि कुनै दल होइन, जनताको सेवा सिक्नुपर्ने उहाँको भनाइ छ।
सरकारले अध्यादेशमार्फत शिक्षालय र कर्मचारीतन्त्रमा देखिएका विकृति हटाउने प्रयास गरेको भन्दै प्रधानमन्त्री शाहले यो कुनै पार्टीविरुद्धको अभियान नभई प्रणाली र भविष्य बचाउने प्रयास भएको स्पष्ट पार्नुभयो।
परिवर्तन भाषणले होइन, निर्णयले आउने भन्दै उहाँले जनताको साथ र विश्वास आवश्यक रहेको बताउनुभएको छ।
