बुटवल,२३ वैशाख । रुपन्देहीको लुम्बिनी सांस्कृतिक नगरपालिकाले सडक अतिक्रमण हटाउने अभियानलाई तीव्र बनाएको छ। नगरपालिकाले बुधबार फुटपाथ खाली गराउन डोजर प्रयोग गरेको जनाएको छ।
गौतम बुद्धको जन्मस्थल लुम्बिनी रहेको यस क्षेत्रमा पैदलयात्रीलाई सहज आवागमन गराउने उद्देश्यले सडक किनारमा बनाइएका फुटपाथमा गरिएको अतिक्रमण हटाइएको कार्यवाहक नगरप्रमुखले जानकारी दिनु भयाे ।
उहाका अनुसार पछिल्लो समय सडक छेउमा अनधिकृत रूपमा पसल, ठेला तथा अस्थायी संरचना राखेर फुटपाथ अतिक्रमण गर्ने क्रम बढेको थियो। नगरपालिकाले यसअघि नै अतिक्रमण हटाउन सूचना जारी गरेको र तोकिएको समयसीमा सकिएपछि डोजर प्रयोग गर्न बाध्य भएको बताइएको छ।
नगरपालिकाले पाँच दिनभित्र मुख्य सडक क्षेत्रका फुटपाथ पूर्ण रूपमा खाली गराउने तथा अन्य स्थानमा व्यवस्थापनको काम गरिरहेको जनाएको छ।
कार्यवाहक नगरप्रमुख हरिजनले अब लुम्बिनी पुग्ने पैदलयात्री तथा पर्यटकलाई आवागमनमा सहजता हुने अपेक्षा व्यक्त गर्नु भयाे ।
अभियानमा नगरप्रहरी, प्राविधिक टोली तथा स्थानीय प्रशासनको सक्रिय सहभागिता रहेको छ। नगरपालिकाले सार्वजनिक स्थलको संरक्षण र व्यवस्थापनका लागि यस्ता अभियान आगामी दिनमा पनि निरन्तर सञ्चालन गर्ने जनाएको छ।
