काठमाडौं,२५ वैशाख । पूर्वमाओवादी नेता सुदन किराती हर्क साम्पाङ नेतृत्वको श्रम संस्कृति पार्टीमा प्रवेश गर्दै हुनुहुन्छ ।
किराती आजैको मितीबाट श्रम संस्कृतिमा प्रवेश गर्न लाग्नु भएको हो् । किरातीले श्रम संस्कृति पार्टीमा वरिष्ठ नेताको जिम्मेवारी पाउने हुनु भएको छ।
किराती सहित १५ जना श्रम संस्कृति पार्टीमा प्रवेश गर्न लागेको पार्टीका प्रवक्ता सत्य घले गुरुङले जानकारी दिनुभयो । बागबजारको हार्दिक होटलमा आज दिउँसो ३ बजे एकता घोषणा कार्यक्रम गर्न लागेको उहाँले बताउनु भएको छ ।
किराती पूर्वपर्यटनमन्त्री हुनुहुन्थ्यो । जेनजी आन्दोलनपछि प्रचण्ड, माधव नेपालसहितका नेताहरुले पार्टी एकता गरेर नेपाल कम्युनिस्ट पार्टी गठन गरेपछि त्यसमा असहमत हुँदै उहाँ प्रगतिशील लोकतान्त्रिक पार्टी (प्रलोपा) मा लाग्नु भएको थियो ।
माओवादीका पूर्वउपमहासचिव जनार्दन शर्माको पहलमा खोलिएको प्रलोपामा सुदन किराती पाँच सदस्यीय अध्यक्ष परिषद्को एक सदस्य हुनुहुन्थ्यो । २१ फागुनको निर्वाचनपछि भने उहाँले पार्टी परित्यागको घोषणा गर्नु भएको थियो ।
