भारतले नेपालबाट निर्यात हुने तयारी चियामा नयाँ कानुनी प्रावधान लागू गरेपछि एक सातायता नेपाली चियाको भारत निर्यात ठप्प भएको छ।
भारतीय चिया बोर्डले मे १ देखि हरेक गाडीमा लोड भएको चियाको छुट्टाछुट्टै नमूना परीक्षण अनिवार्य गरेपछि काँकडभिट्टा–पानीट्यांकी नाकामा चिया बोकेका गाडी रोकिएका छन्। यसअघि एउटा नमूना परीक्षणपछि तीन महिना वा २० गाडीसम्म निर्यात गर्न पाइन्थ्यो।
नयाँ नियमअनुसार नमूना परीक्षणका लागि कोलकाता पठाउनुपर्ने भएकाले रिपोर्ट आउन कम्तीमा एकदेखि दुई साता लाग्ने उद्योगीहरूको भनाइ छ। यसले लागत, ढुवानी जोखिम र उत्पादन बिग्रने सम्भावना बढेको भन्दै उद्योगीहरूले नयाँ चिया पठाउन रोकेका छन्।
नेपालका चिया उद्योगीहरूले भारतीय बजार गुम्ने खतरा बढेको बताएका छन्। उनीहरूका अनुसार दार्जिलिङ चियासँग प्रतिस्पर्धा बढेकाले नेपाली चियामाथि पटक–पटक अवरोध सिर्जना हुँदै आएको छ।
सरकारी अधिकारीहरूले भने भारतले यो प्रावधानबारे अघिल्लो महिनादेखि जानकारी दिएको बताएका छन्।
नेपालबाट उत्पादन हुने सिटिसी चियाको आधाभन्दा बढी र अर्थोडक्स चियाको करिब ९० प्रतिशत भारत निर्यात हुने भएकाले उद्योगीहरूले तत्काल कूटनीतिक पहल गर्न सरकारसँग माग गरेका छन्।
