पथरी, २ जेठ / मौद्गल्य गोत्रीय तिमल्सिना समाज कोशीको तेस्रो अधिवेशन २०८३ असोज १० गते हुने भएको छ ।
समाजको कोशी प्रदेश समिति अध्यक्ष हरि तिम्सिनाको अध्यक्षतामा समाजको मोरङ बेलबारीस्थित भाउन्नेको कार्यालयमा आज बसेको बैठकले असोज १० मा चुनावी अधिवेशन गर्ने निर्णय गरेको नवनिर्वाचित केन्द्रीय उपाध्यक्ष एवम् प्रदेश सचिव निरोज तिम्सिनाले जनाउनु भयो । अधिवेशन सोही कार्यालय भवनमा सम्पन्न हुने र संशोधित विधान बमोजिम नयाँ समिति चयन हुनेछ । केन्द्रीय समितिका सात उपाध्यक्षहरु सात प्रदेशका अध्यक्ष, जिल्ला अध्यक्षहरु प्रदेश समिति सदस्य, पालिका अध्यक्षहरु जिल्ला समिति सदस्य रहने नयाँ प्रावधान छ ।
बैठकले, भोजपुरका गणेशराज तिम्सिनालाई केन्द्रीय सदस्यमा मनोनयनका लागि सिफारिस गरेको छ । साथै समाजको केन्द्रीय समितिले हालै संशोधनसहित प्रकाशित गरेको वंशावलीको विषयसूचीमा सुनसरी जिल्लाको नामै छुटेको तथा केन्द्रीय समितिमा बुझाएका वंशावलीका केही तथ्यांकहरु समेत छुट्न गएकाले त्यसलाई संशोधन गर्न समेत अनुरोध गरेको छ ।
प्रदेश अधिवेशन अगावै जिल्ला अधिवेशन सम्पन्न गर्नुपर्ने प्रावधान बमोजिम प्रदेश समितिले जिल्लामा सर्कुलर पठाउने उल्लेख छ । समाजले तिमल्सिना बन्धुबान्धवहरुको वंश खोजी, एकता तथा उनीहरुको हकहितका गतिविधि गर्दै आएको छ ।
