मोरङ,५ जेठ । मोरङको उर्लाबारी–४ का रमेश भण्डारी २९ वर्षको हुनु भयो। उमेरले अझै युवावस्थामै रहेका भण्डारीले भने जीवनको आठ वर्ष सर्प उद्धारमा बिताइसकनु भएको छ। यस अवधिमा उहाँले १ हजार ३ सयभन्दा बढी सर्प सुरक्षित रूपमा उद्धार गरिसकनु भएको छ भने कहिले खेत खलियानबाट, कहिले भान्छा घरबाट, त कहिले मानिसको ओछ्यानबाटै। भण्डारीको सर्पसँगको सम्बन्ध २० वर्षको उमेरदेखि सुरु भयो। छिमेकी तथा वन प्राविधिक प्रेम विष्टसँगको संगतले उहाँलाई सर्प प्रेमी बनायो। कुनै विशेष उपकरणबिनै ठुला सर्पलाई समात्ने विष्टको सीपले उहाँलाई आकर्षित ग¥यो। त्यही सिकाइले उहाँलाई पनि बिस्तारै सर्प समात्न र उद्धार गर्न सक्षम बनायो।
सुरुआती दिन सहज थिएनन्। अविषालु सर्प समात्ने क्रममा उहाँ पटक–पटक डसिनु भयो। तर विष नभएका सर्पले ज्यान लिँदैनन् भन्ने आत्मविश्वासले उहाँलाई रोक्न सकेन। बिस्तारै उहाँले विषालु सर्पको व्यवहार, जोखिम र उद्धार विधिबारे पनि गहिरो ज्ञान हासिल गर्नु भयो। सर्पले उद्धारकर्तालाई चिन्छ जस्तो लाग्छ,भण्डारी भन्नु हुन्छ, हामी पुगेपछि सर्प अझै सतर्क हुन्छ। त्यसैले धेरै सजग हुनुपर्छ। उहाँका अनुसार सर्प देख्ने बित्तिकै ढुंगा हान्ने, लाठीले हिर्काउने वा आगो लगाउने प्रवृत्ति गलत हो। त्यस्तो गर्दा सर्प आक्रामक बन्छ। सर्पले आफूलाई खतरा महसुस नगरेसम्म मानिसलाई टोक्दैन, उहाँले भन्नु भयो।
भण्डारी सर्पलाई जोखिमको स्रोत होइन, वातावरणीय सन्तुलनको महत्त्वपूर्ण अंग मान्नु हुन्छ्। उहाँका अनुसार सर्पले खेतबारीमा मुसा नियन्त्रणदेखि विभिन्न कीटाणु नियन्त्रणसम्म भूमिका खेल्छ। तर समाजमा अझै पनि सर्पप्रति गहिरो भय कायम छ। यही डर हटाउन भण्डारी विद्यालय, किसान समूह र स्थानीय संघसंस्थामा पुगेर जनचेतनामूलक कार्यक्रम सञ्चालन गर्नु हुन्छ्। वासस्थान सुरक्षित राख्न सके सर्प घरमा पस्दैनन्, उहाँ भन्नु हुन्छ्, तर मानिसकै कारण सर्प पनि जोखिममा परेका छन्।
सुरुका दिनमा परिवारले यस्तो जोखिमपूर्ण काम नगर्न सुझाव दिएका थिए। तर उहाँले आफ्नो बाटो छाडनु भएन। अहिले वर्षायाममा त प्रायः दैनिक जसो सर्प उद्धारमा उहाँको दिन बित्छ। सूचना आउनासाथ उहाँ जुनसुकै बेला घरबाट निस्किनु हुन्छ। यो काम पूर्ण रूपमा स्वयंसेवी हो। आर्थिक आम्दानी छैन। तर उहाँ सन्तुष्ट हुनुन्छ। पैसा कमाइ नभए पनि नाम चलेको छ, उहाँ मुस्कुराउँदै भन्नु हुन्छ, त्यसैलाई नै आफ्नो सम्पत्ति ठानेको छु। उहाँले दुखेसो पोख्नु भयो, स्थानीय ठाउँमा कला क्षमताको सम्मान छैन ।
